Dơ̆ pơrlòng geh 2 Mpồl: Mpồl Jơnau kơlôi mờ Mpồl Rơndăp broă lơh. Mpồl jơnau kơlôi geh ală jơnau kơlôi sơnđờm mŭt lơh broă neh geh halà ờ hềt geh phan bơna, drơng broă sa priă, broă lơh tơrlòng lài lơh lài (demo), mơya ờ hềt tăc tàm drà mờ ờ hềt lơh geh priă bơh kă bro. Starup geh jơnau kơlôi niam rơ̆p geh bơyai lơh bơsram tàp, dong kờl lơh sir jơnau kơlôi, tàm tơrbŏ mờ cau gĭt wă jrô, cau bơcri priă nàng gơtùi bơ̆t bơtàu gơs ală rơndăp broă lơh bềng bơta pràn.

Mpồl Rơndăp broă lơh geh ală rơndăp broă lơh sơnđờm mŭt lơh broă neh geh phan bơna, drơng broă sa priă, broă lơh tơrlòng lài neh tăc tàm drà halà lơh tơrlòng mờ năc ngan ngồn, mờ neh lơh geh priă jền bơh kă bro; halà ờ hềt geh priă bơh kă bro mơya neh geh priă tă lơh mùl màl geh cih dờp bơh sră cơng tàng, tơl cơng tàng kờp dŭ nàng sền swì cồng nha priă jền.

Ală rơndăp broă lơh geh bơta pràn geh tŭ niam geh dong kờl lơh sir broă lơh tơrlòng lài kă bro, tơngguh uă bơta chài sền yal, tàm tơrbŏ bơta pràn mờ tus bal ală anih nhơl sơnđờm mŭt lơh broă tàm broă dờng rlau.

Ồng Lê Đức Niêm, Phó Pơgru dờng, Tiến sìh, Phó Lam bồ Klờng Đại họk Tây Nguyên, đơs tơngume dơ̆ pơrlòng nam do geh bơta mùl màl, đơs sùm jơnau sồr tam gơl jơnau kơlôi gơgơs bơta kwơ mùl màl.

“Tơngume ‘Bơh jơnau kơlôi tus bơta kwơ’ là jơnau đơs loh làng ngan, tơnggŏ nùs nhơm tam gơl pa bơceh lơh jăt ală jơnau lơh nền tàm pơrjum Đảng dê, bè Jơnau lơh nền tàm pơrjum 57. Hơ̆ ngan là broă ai ală gùng dà broă rơndăp lơh, măy mŏk mŭt tàm mùl màl nàng lơh gơlik bơta kwơ. Do là tŭ niam nàng ală cau sơnđờm mŭt lơh broă, mpồl lơh sa kă bro pa tơnggơs tus bal, lài ngan là lùp bơsram, tơnơ̆ hơ̆ là yal uă măt kă bro, mơkung pơn jờng yờ tơngguh ală jơnau kơlôi mờ bơta kwơ mờ mpồl lơh sa kă bro lơh gơlik”.

Gơ wèt mờ cau bơsram dờng, dơ̆ pơrlòng kung pờ gơlik tŭ niam sền gŏ, geh tai bơta gĭt wă mờ tơrlòng pràn mờ ală jơnau kơlôi pa. Oh Trần Thị Thiện Hạnh, cau bơsram dờng Klờng Đại họk Tây Nguyên, yal:

“Dơ̆ pơrlòng geh kwơ ngan. Gơ dong oh geh tai bơta mờng chài, geh tŭ niam sền gŏ, tơrlòng pràn he dê, bơh hơ̆ bơtơl bơta gĭt wă mờ drơng ai ală tŭ lơh broă tơnơ̆ do in”.

Ồng Trần Thanh Sơn, Phó Kwang Lam bồ Sờh Jak chài mờ Măy mŏk càr Dăk Lăk pà gĭt, broă lơh tam gơl pa bơceh lơh gam geh bơnàng jă mờ pơlam gùng loh làng rlau bal mờ Jơnau lơh nền tàm pơrjum 57 mờ Adăt Jak chài, Măy mŏk mờ Tam gơl pa bơceh lơh. Dơ̆ pơrlòng wèt tus sồr ai ală jơnau kơlôi, rơndăp broă lơh gơ jăt bal mờ broă lơh gơgơs mpồl lơh sa kă bro geh tơl pràn lơh gơlik bơta kwơ mờ tă pơgồp ai mpồl bơtiàn in. Sờh Jak chài mờ Măy mŏk rơ̆p lơh ngan tàm tơrbŏ mpồl lơh sa kă bro, cau dong kờl nàng lòt bal bal mờ ală rơndăp broă lơh geh khà, dong kờl bơtàu tơngguh mpồl lơh sa kă bro mờ rề ơnàng ală broă lơh tơrlòng lài geh cồng nha.