Jơnau yal tàm pơrjum, tàm 9 nhai nam 2026, kờp jơh priă bơcri lơgar ndai dan bơcri priă tàm lơgar Việt Nam lơh geh rlau 50 tơmàn dolar Mỹ, gơguh rlau 76% pơndrờm dùl tŭ bal mờ nam 2025. Gơwèt mờ 15 càr, ƀòn dờng tiah đah Jum priă bơcri lơgar ndai dan bơcri priă lơh geh rlau 22 tơmàn dolar Mỹ mờ 1 rơbô 830 rơndăp broă lơh ai pa.

Nàng gơ hòi gơ jà, wă priă bơcri lơh tơn bơh lơgar ndai tàm ală nhai gam wơl bơh nam 2026 kung bè nam 2027, Kụk Bơcri priă lơgar ndai, Bộ Priă jền mơ ala mat gah geh gơnoar ală càr tiah đah Jum ring bal mờ broă lơh: rcang mpồl cau lơh broă geh bơta chài lơh broă ai ală rơndăp broă lơh ngui măi mok pa in; rcang ală bơta bè phan bơna bơt bơtàu, năng lượng drơng broă lơh sa; kơlôi sơnơng broă lơh lơh broă bal bơto bơtê jat sră dan blơi bơh ală mpồl lơh sa kă bro lơgar ndai dê... Tàm hơ̆ ntrờn bơta tờm bơh gơ hòi gơ jà priă bơcri bè ờs tus tơnguh uă bơta niam, geh cồng nha mờ bơta pràn lơh gơrề uă bơh bơcri priă lơgar ndai dê jat di nùs nhơm Jơnau lơh nền tàm pơrjum sồ 10 bơh Bộ Chính trị dê bè bơtàu tơnguh lơh sa geh priă bơcri lơgar ndai mờ ală broă lơh tàm Jơnau lơh nền tàm pơrjum sồ 280 bơh Chính phủ dê.