Ngai 09/11/1946, tàm Dơ̆ pơrjum dơ̆ bàr, Quốc hội khoă I neh ring bal pang sră Sơnoa boh lam bơh sơnrờp lơgar Việt Nam Dân chủ Kộng hoà dê, lơh tềl dùl bơta bơtàu tơngguh kwơmàng tàm jơnau kah yau lơh sơnoa boh lam, lơh kơrnoăt boh lam bơh dà lơgar dê.

Sơnoa boh lam nam 1946 tơlik măt, đơs nền rài lơngăp lơngai is, gơnoar tờm ù tiah dà lơgar, lơh nền ală jơnau pal jăt tờm ngan rơndăp lơh mờ lơh broă bơh mpồl lơh broă dà lơgar dê, mơkung cih dờp ală gơnoar mờ kơnòl pal lơh tờm ngan bơh làng bol tàm lơgar dê. Sơnoa boh lam nam 1946 tơnggŏ bồ tơngoh gơguh jak bè bơ̆t bơtàu Dà lơgar làng bol dê, yờ tơnguh gơnoar lơh tờm bơh làng bol dê, gơnoar khăt gơboh, làng bol lơh tờm mờ jơnau pal jăt ring bal tềng đăp kơrnoăt boh lam. Sơrlèt rlau 80 nam, bal mờ ală tŭ bơ̆t bơtàu, sền gàr mờ bơtàu tơngguh dà lơgar, ală kơrnoăt boh lam Việt Nam sùm geh lơh sir, lơh geh jơnau sồr ătbồ dà lơgar, bơtàu tơngguh lơh sa – mpồl bơtiàn mờ mŭt gơrờm bal mờ ală lơgar. Ală bơta kwơ bè lơngăp lơngai is jơi bơtiàn, gơnoar lơh tờm làng bol dê, gàr niam gơnoar kòn bơnus, gơnoar làng bol tàm lơgar mờ rơndăp lơh gơnăp gơnoar dà lơgar jăt Sơnoa boh lam pơn jăt tai geh tàm pơdờn, bơtàu tơngguh tàm ală pang sră Sơnoa boh lam bơh tơl tŭ tơngai.