Tàm gùl suơn điều tàm ƀòn Bi, sàh Ia Dom, dùl bơnah ù neh geh wàs goh nàng drơng broă jòi ƀồc ntìng cau ling chơ̆t màng. Ală tờm điều gam ai tơnhào geh koh sang jat jơnau kơ̆p kờñ bơh cau tờm suơn dê là kra ƀòn ồng Siu Pich, dùl nă cau ling yau neh tam lơh tàm tiah nhàr lơgar đah Jum mat tơngai mut.

Tàm ală dơ̆ lơh broă tàm mìr, ồng Pich gŏ ală bơnah toal tang, ơyun mpờl tềng tăp ù suơn điều dê. Pin là geh ƀồc ntìng cau ling chơ̆t màng, ồng yal ai mpồl lơh broă geh gơnoar in, lam gùng mờ sơñio tơn tiah nàng cau ling in lòt sền. Bulah suơn điều là tiah lơh geh priă jền bơh hìu bơnhă dê, kra ƀòn ồng Siu Pich ờ pơlai nàng koh kơl tờm chi, ai ù nàng jòi ală cau ling gam ơm bĭc wơl tàm do.

 “Tơm chi añ koh mơya añ gŏ gơ lơh chờ hờp, crăp rcang koh kơl, tài bơh cau ling bal bơh he dê ơm bĭc bè do gŏ sơnđàc ngan”.

Lòt ling nhai 11/1975, neh tam lơh tàm tiah nhàr lơgar đah Jum mat tơngai mut, kra ƀòn ồng Siu Pich gĭt wă bơta cui rơcai bơh rài tam lơh mờ bơta jê sồt tŭ cau ling bal chơt phi să. Tài bè hơ̆, tŭ cau ling Mpồl K52 rê wơl tiah nhàr lơgar do nàng lòt jòi ƀồc ntìng cau ling chơ̆t màng, ồng Pich kung bè jòi wơl dùl bơnah kir sơnrai bơh să tờm he dê.

Mờr dùl nhai do, tiah suơn điều ngài mờ hìu ơm pơgăp 7 kơi sồ gơ gơs tiah ồng sùm lòt rê. Ală tŭ ru, ồng tus lùp còp mờ tơm bơh bơr mờ ală cau ling gam lơh kơnòl broă. Tàm bơta duh bơh trồ tơngai, bơta càl puh bơh tiah nhàr lơgar dê, cau ling yau jat sền tơl broă lơh bơh mpồl cau ling ngai do dê. Ồng wă là, tơnơ̆ pah dơ̆ tờ ù mờ kơwao, tơl dơ̆ tờ ù jòi là bơta kơ̆p gơn jun geh tai dùl nă cau ling bal rê wơl.

“Añ kơ̆p kờñ lơh bè lơi cau ling bal añ dê geh rê wơl mờ hìu bơnhă, sơlơ uă sơlơ niam. Añ gŏ ală oh mi cau ling lòt jòi cau ling bal bè do bòl glar mờ kal ke ngan. Trồ tơngai duh, càl puh kal ke ngan, nùs nhơm cau ling bal bè añ gŏ kwơ ngan”.

Bơh jơnau bơh kra ƀòn ồng Siu Pich dê yal, kwang bàng, cau ling Mpồl ling 1, Mpồl K52, Phòng Chính trị, Gah đơng lam ling klàng càr Gia Lai neh bơyai lơh lòt sền, sền gĭt mờ lam lòt jòi tàm tiah suơn điều.

Thượng tá ồng Hoàng Viết Ngọc, Chính trị viên Mpồl K52, pà gĭt, tus tŭ do, mpồl ling neh rồ tơrgùm geh 16 ƀồc ntìng cau ling chơ̆t màng bal mờ uă phan lời wơl bè: ntìng, sề, toal tang, ơyun bơh cau ling dê. Is ồn, tàm khà hơ̆ geh dùl ƀồc ntìng geh bal tơrñang cih mat cau ling chơ̆t màng Nguyễn Thanh Trì, chơ̆t phi să ngai 18 nhai 5 nam 1970. Do là jơnau yal geh kwơ màng uă ngan, dong ală anih lơh broă geh gơnoar pơn jat tai đal gĭt mat mờ lòt jòi cau pròc mhàm bal bơh cau ling chơ̆t màng dê.

“Bơh jơnau yal bơh ồng Siu Pich dê bol añ neh lòt sền mờ sền gĭt. Ồng Siu Pich đơs là tŭ tơngai pơgăp nam 1973 neh gĭt bè tiah do rao. Tơnơ̆ tŭ sền gĭt gŏ geh ală bơta adat boh lam tơl làm mờ geh bơta digơlan geh den tàng mpồl ling neh lơh dơ̆ lòt jòi bơh ngai 5 nhai 10 tus tŭ do".

Tàm sàh Ia Dom, gơnoar atbồ tiah do gam pơgồp bal mờ Mpồl K52 hòi jà làng bol yal jơnau yal, dong kờl mat ù mờ lơh geh ală bơta ƀuơn ngan ai broă lơh lòt jòi, rồ tơrgùm ƀồc ntìng cau ling chơ̆t màng. Tơnơ̆ tŭ jòi gŏ ală ƀồc ntìng, sàh ai tiah duh khoai tàm Mpồl đơng lam Ling klàng sàh nàng làng bol in tus chu ñàng, kah kơlôi ală cau neh chơ̆t phi să.

Ồng Trần Ngọc Phận, Bí thư Đảng ủy sàh Ia Dom, pà gĭt, ală jơnau yal bơh ală cau kra ƀòn, lam bồ ƀòn mờ cau dờng sơnam dê yal neh pơgồp bơnah kwơ màng tàm gùng lòt lòt jòi ală cau ling chơ̆t màng gam ơm bĭc wơl tàm ù tiah do dê.

“Ală cau tus bal tam lơh, cau kra, lam bồ ƀòn, cau kra ƀòn neh yal dùl mpồl jơnau yal kwơ ngan, bol añ pơn jat tai pơgồp bal mờ Mpồl K52, Gah đơng lam Mpồl ling klàng càr rơ̆p lơh ală bơta lơi niam ngan rlau jơh nàng jun ală wa rê wơl mờ làng bol, rê wơl mờ ù mè, tơngŏ bơta gĭt ưn ngài gơwèt mờ ală cau ling neh chơ̆t phi să ai jơh mhàm ntìng nàng cèng wơl lơngăp lơngai is, khat gơboh ai dà lơgar in”.

Tàm Ia Dom, jơnau bơh kra ƀòn, cau ling yau ồng Siu Pich dê gam là jơnau yal bè ală kir sơnrai tam lơh kung gam geh sền gàr tàm nùs nhơm làng bol dê, bè nùs nhơm cau ling bal ờ hềt tŭ lơi jơh mờ bơta nđàc ling klàng làng bol kơ̆ sùm tàm tiah nhàr lơgar. Tàm ù tiah nhàr lơgar Gia Lai, gùng lòt jòi hơ̆ kung gam pơn jat tai. Ală cau ling Mpồl K52 kung tơryang tơryồng jat ală tềl lời wơl, làng bol kung gam pơgồp bal bơta pràn mờ ală bơta he dê gĭt. Jơh ală geh bal dùl bơta kơ̆p kờñ là jun ală cau ling chơ̆t phi să rê wơl mờ ù mè, nàng bơta kơ̆p gơn bơh gĭt nđờ hìu bơnhă dê geh jơh đau, nàng nùs nhơm cau ling bal mờ bơta nđàc ling klàng làng bol dê pơn jat tai àng niam tàm rài kis tŭ do dê.