Tàm tiah bơsram 3, hìu bơsram bal 1, Hìu bơsram Kấp dùl Tây Nha Trang, càr Khánh Hoà, kơnòm bơsram ơm ngai tơn kung gam pal rê hờ hìu tàm ngai dơ̆ poan pah poh, tơnơ̆ mờ hơ̆ cau mè bèp kơnòm bơsram jun ală kơnòm bơsram tus hìu bơsram tờm nàng bơsram môn Tin học. Tiah bơsram ing bơh hìu bơsram bal 1 ờ hềt geh jơdŭ măi vi tính, den tàng neh lơh broă bơto bơsram đah ală hìu bơsram dê ờ hềt ndrờm bal. Kơnòm bơsram tàm do kung ờ hoan geh tơl bơta niam nàng tus bal mờ ală broă lơh bè kơnòm bơsram tàm hìu bơsram bal tờm ha là tàm hìu bơsram tờm dê.

Mò Nguyễn Thị Dung, cau mè bèp kơnòm bơsram ơdŭ 4, hìu bơsram bal 1, Hìu bơsram Kấp dùl Tây Nha Trang đơs tus mờ bơta kal ke: “Pal lòt bơh hìu bơsram bal ing do tus hìu bơsram bal tờm hơ̆ sồng geh jơdŭ măi vi tính nàng bơsram. Ờ gŏ geh cau mè bèp lơi ru nàng jun rò hơ̆ sồng tus 1 jơ nggùl den pơn diang tus tàm hơ̆ nàng bơsram. Tàm tŭ hơ̆ neh bơsram ơm ngai tơn, mơya ngai dơ̆ poan pah poh pal rò kòn rê bè hơ̆ tai. Đơs ngan broă lơh do rơ̆p ờ ndrờm bal gơwèt mờ ală kơnòm tàm hìu bơsram tờm, phan bơna kung bè hơ̆ sơl”.

Tơmŭt bal dong kờl tơrmù cau atbồ mơya ờ ndrờm bal mờ broă bơto bơsram đah ală hìu bơsram bal geh tơl ndrờm bal. Tŭ phan bơna ờ hềt di pal mờ jơnau kờñ, kơnòm bơsram kung gam kal ke, gam cau mè bèp kơnòm bơsram pal kong tai broă jun rò. Hìu bơsram Kấp dùl Tây Nha Trang geh lơh tàm tơngu me tơmŭt bal 7 hìu bơsram, tàm hơ̆ geh 1 hìu bơsram tờm mờ 6 hìu bơsram bal, mờ 198 ơdŭ bơsram, di pơgăp 7 rơbô 400 nă kơnòm bơsram. Hìu bơsram Kấp bàr Tây Nha Trang geh lơh bơh 6 hìu bơsram, mờ di pơgăp 5 rơbô 400 nă kơnòm bơsram.

Broă tơmŭt bal lài ngan dong kờl ring bal broă rơndăp lơh, jơnau geh ai mờ tam pà kơnòl. Mơya mờ broă geh tus git nđờ rơhiang ơdŭ bơsram, ală hìu bơsram bal ơm tam cah ngài mờ ờ ndrờm bal bè phan bơna, kơnòm bơsram neh lơh broă đơng lam gơtìp uă kal ke. Mpồl cau atbồ hìu bơsram pal ai uă ngan tơngai nàng đơng lam broă lơh đah ală hìu bơsram, tàm tŭ broă lòt sền broă lơh tờm, sền bơto mờ git ală bơta bè cau pơgru, kơnòm bơsram gơtìp ờ nền nòn. Atbồ bơh tàm pang sră, jơnau yal tàm internet ờ gơtùi ala jơh broă tus tơn sền broă lơh tàm ală hìu bơsram dê, tàm hơ̆ uă ngan là broă gŏ mờ dong kờl di tŭ ală kơnòm bơsram kờñ geh sền gròi.

Bơh tàm mùl màl do, Anih duh broă Làng bol sơnah ƀòn Tây Nha Trang dan tam cah Hìu bơsram Kấp dùl mờ Kấp bàr Tây Nha Trang, tơl kấp gơs 2 hìu bơsram krơi is. Ồng Nguyễn Công Danh, Phó Chủ tịch Anih duh broă Làng bol sơnah ƀòn Tây Nha Trang yal: “Ală kơnòm bơsram Kấp bàr gam tàm sơnam pa tào, cau pơgru pal jăt sền kơnòm bơsram tàm hìu bơsram. Bơh 70 tus 80 ơdŭ bơsram, mờ bơta bè do, atbồ ƀuơn rơlao. Gơwèt mờ Kấp dùl, dùl nă Phó lam bồ gam drơng broă dùl hìu bơsram bal, pal atbồ 4 tiah bơsram. 4 tiah bơsram hơ̆ ờ rềp bal, ngài bal. Bè tàm do, đah Hòn Nghê gam pal gan dùl dà dờng. Ờ gơtùi lơh sir, bè jŏ jòng den ờ gơtùi”.

Nhai 8 nam 2026, càr Khánh Hoà lơh gùng dà broă lơh tơmŭt bal hìu bơsram, yal mờ dan jơnau pơgồp bal bơh Mpồl Lơh kơnòl broă sùm Tỉnh ủy dê. Tơnơ̆ tơmŭt bal, khà hìu bơsram gơmù tus 66%. Mơya, gùt càr kung gam geh 18 hìu bơsram rơlao 100 ơdŭ bơsram, mìng tàm ală tiah drà gal làng bol ơm kis. Tơnơ̆ bàr nhai lơh broă, geh ờ uă tiah neh dan tam cah is hìu bơsram dờng gơs uă hìu bơsram ha là crơng gơs tai hìu bơsram bal. Tŭ do, Sờh Bơto bơtê mờ Bơsram càr Khánh Hoà gam bơyai lơh tơrgùm jơnau đơs, jơnau dan bơh ală tiah dê nàng sền wơl ală hìu bơsram dờng, geh uă hìu bơsram bal, tiah bơsram mờ ù tiah atbồ ơnàng, bơh tŭ hơ̆ dan geh gùng dà broă lơh gơdờp bal.