Càr Lâm Đồng tŭ do geh 180 kơi sồ gùng rơndeh lòt mhar, mờr 1 rbô 400 kơi sồ gùng dà lơgar mờ mờr 1 rbô 300 kơi sồ gùng càr. Tàm ală nhai mìu càl rbut pa do tàm ală gơl gùng dà lơgar tàm càr Lâm Đồng bè: 20, 27, 28B, 55… neh geh uă anih tơrlah, ngơr bam lơh gơ kòl gùng lòt.

Nàng gàr niam gùng lòt tàm nhai mìu càl rbut nam do, càr Lâm Đồng gam kờp sền, cih mat mùl màl tơl anih pơhìn gơlik geh kòl gùng tàm 8 gơl gùng dà lơgar mờ gùng càr, mờ kung geh broă rơndap lơh rơcang lài pleh mùl màl. Anih duh broă làng bol càr Lâm Đồng sồr ală anih lơh broă geh gơnoar sền gròi tus broă gàr lơngăp lơngai tàm ală tiah tơrlah, ngơr bam lài mờ tŭ tơmut bal 3 càr Lâm Đồng, Dăk Nông mờ Bình Thuận. Gơrềng tus tơrlah gùng dà lơgar 14 tàm Gia Nghĩa, càr sồr tàm tơngai mìu càl rbut pal ai cau ơm sền gròi ngai mang, rơcang lài phan bơna, măi mok nàng di tŭ bơsong broă ờ niam gơlik geh.