Yal tàm dar pơrjum pà gĭt, lơh sa pơn jat tai cih dờp uă bơta niam. Kờp jơh priă lơh geh bơh tăc mờ blơi phan bơh lơgar ndai dơ̆ sơn rờp lơh geh rlau 1 rơbô tơmàn dolar Mỹ. Priă bơcri tơn lơgar ndai dan cih mat lơh geh pơgăp 55 tơmàn dolar Mỹ, priă dia dà lơgar lơh geh 2 tơlak 440 rơbô tơmàn đong. Pal sền là, rlau 900 rơndăp broă lơh gam gơ kòl neh geh ai mut ngui.

Đơs pơndŭt dar pơrjum, ồng Lê Minh Hưng- Thủ tướng Chính phủ đơs sùm, gròi sền roh giă priă, gàr kơ̆ kơl jăp lơh sa dờng là kơnòl broă ai lơh lài uă ngan rlau jơh tàm 2 nhai lồi nam, lơh geh bơnàng jă ai gơguh tai kơ̆ kơl jăp mờ gàr niam rài kis mpồl bơtiàn. Thủ tướng sồr ală Bộ, gah, ală tiah kràñ cê jơh nùs ai priă bơcri 100% broă rơndăp lơh bơcri priă dà lơgar, tă bơsong kal ke ai ală rơndăp broă lơh lơyài tŭ tơngai mut lơh, bơsong kòl yan bè hìu ơm dà lơgar, anih lơh broă dà lơgar mờ ù dà lơgar. Mơkung lơh pràn tăc phan mờ lơgar ndai, gơ hòi gơ jà ngui sa tàm lơgar, tàm tơrbŏ bal jơnau kờñ mờ gơ hòi gơ jà kă bro phan, pơgồp bơnah lơh jat jơnau kờñ gơguh tai lơh sa gùt nam dê.