Tàm dơ̆ lơh broă, ala mat kwang đơng lam bồ 3 càr Lâm Đồng, Bình Thuận mờ Dăk Nông neh yal tŭ tơngai lơh jat gùng dà broă lơh lam lơh tơrmŭt bal 3 càr, gùng dà broă lơh rơndăp tăp sèng mpồl lơh broă ală anih lơh broă ờs mờng, tơmŭt bal kấp sàh mờ bơt bơtàu broă lơh rơndăp broă lơh gơnoar atbồ ală tiah 2 kấp, yal pơgồp bal lơh jat kơlôi sơnơng, lơh sră nggal Pơrjum dờng Đảng ƀộ càr Lâm Đồng pa, sră nggal Pơrjum dờng Đảng ƀộ kấp ƀòn lơgar.

Tơnơ̆ tơ̆ tŭ geh gùng dà broă lơh tơmŭt bal 3 càr, ală rơnàng làng bol tàm càr Lâm Đồng kung tơngŏ bơta sền gròi bè broă lòt rê, rơndăp tiah ơm rlô, sa sào ai kwang bàng 2 càr Dăk Nông mờ Bình Thuận in rơ̆p rê tàm anih tờm sră nggal gơnoar atbồ geh lơh tàm ƀòn dờng Dà Làc lơh broă. Ồng Hồ Trung Hiếu, ơm tàm sơnah ƀòn 4, ƀòn dờng Dà Làc, đơs:“Kơlôi rcang ngan tŭ mờr 2 rơbô nă oh mi kwang bàng kông cứk bơh 2 càr Dăk Nông mờ Bình Thuận rơ̆p rê tàm do lơh broă, den broă rơndăp tiah ơm, bơsong jơnau kờñ ai ală oh mi do in bè lơi. Tài bơh ngan ngồn là tŭ oh mi rê tàm do, broă lòt rê ngan ngồn rơ̆p gơtìp kal ke rao, jơnau kờñ tiah ơm kis tàm ƀòn dờng Dà Làc, dilah bè jŏ jòng den rơ̆p tơnguh tai jơnau kờñ bè tiah ơm. Añ kơ̆p kờñ càr Lâm Đồng pal geh pơlam gùng dà mờ broă lơh mhar nàng bơsong”.  

Tềng đăp bơta sền gròi, kơlôi sơnơng bơh làng bol dê bè broă lòt rê, tiah sa anih ơm ai làng bàng in tơnơ̆ tŭ tơmŭt bal càr, ồng Nguyễn Ngọc Phúc, Phó Củ tịc Anih duh broă Làng bol càr Lâm Đồng pà gĭt, tiah do neh geh rơndăp broă lơh ai broă do in: “Bol añ neh lòt sền pơgăp 10 anih ơm nàng kwang bàng ală càr in tus lơh broă. Tiah ơm, hìu ơm ai cau lơh kơnòl broă dà lơgar in den kung gam lòt sền, sền sơ wì nàng gàr niam oh mi in geh tiah ơm, tiah sa sào kơ̆ kơl jăp. Rơndeh rơndồ ntrờn lòt rê, bol añ kờp dŭ dilah rơndeh 50 cơghĕ den càr Dăk Nông kờñ geh pơgăp 10 nơm rơndeh dồ dơ̆ bal, lòt tàm ngai Rlô halà drim ngai dơ̆ 2 nàng oh mi in lòt lơh broă, Bình Thuận den kung pơgăp bơh jơ̆t nđờ nơm tus 20 nơm rơndeh. Bol añ kung dan mờ Cíñ phủ pal geh broă lơh, broă lơh dong kờl priă jền tơn ai ală kwang bàng do in geh priă jền nàng ntrờn lòt rê”.

 Phó Thủ tướng Duh broă sùm Cíñ phủ ồng Nguyễn Hoà Bình jờng rơ uă ngan bơta ring bal bơh 3 càr dê tàm broă lơh đơng lam, pơgồp bal lơh jat kơnòl broă bè tơmŭt bal, rơndăp tăp sèng mpồl lơh broă, rcang niam ngan ală tơngume ai pơrjum dờng Đảng ală kấp in. Mơkung tơngkah ală tiah kờñ pal pơn jat tai lơh jat niam nùs nhơm tam klăc bal lơh jat kơnòl broă bal, ngan là broă lơh sră nggal pơrjum dờng dê; ai mờ rơndăp tăp sèng kwang bàng ai pơrjum dờng, ai ală anih lơh broă, mpồl lơh broă in; sồr lơh jat geh cồng nha ală kơnòl broă bơtàu tơnguh lơh sa- mpồl bơtiàn. Is ồn tơngkah, càr Lâm Đồng pal lơh niam broă lơh cíñ trị, bồ tơngoh tàm kwang bàng, đảng viên; rơndăp kwang bàng lơh broă bơnĕ bơnài bal, gàr niam bơta lơh broă tơl jơnau sồr, wèt tus bơta kwơ bal. Phó Thủ tướng Duh broă sùm Cíñ phủ ồng Nguyễn Hoà Bình đơs: “Pal lơh niam broă lơh pơndờm pơnđiang, cíñ trị bồ tơngoh jơh ală sờh, mpồl, gah broă, ală sàh, ală kơnhoàl tơnơ̆ do rơ̆p tơn jơh lơh broă. Tŭ do lơh jat bơta tàm jàu broă bơh Đảng dê bol he tàm jàu broă lơi den lơh broă hơ̆, mơya ờ gŏ di tàm nùs nhơm bồ tơngoh geh broă do ờ geh broă ne ờ. Añ sồr bol he ơn broă jàu, jơnau sồr lơh, ală bơta mờ bơta nùs nhơm lơh broă di pal ngan, song dơ pă tàm tŭ bơsong broă hơ̆ là broă lơh di ngan rlau jơh. Bè bơta dồ nă să is den bol he kung pal geh bơta jàu phi sơl”.

Bè broă lơh ai mờ rơndăp tăp sèng kwang bàng, Phó Thủ tướng Duh  broă sùm Cíñ phủ ồng Nguyễn Hoà Bình đơs nền: do là kơnòl broă jal mhar, niam ngan, gàr niam bơta yal loh làng, song dơ pă. Pal ơn broă bè tơl bơta jak chài kwang bàng dê lài ngan rlau jơh, gàr niam jơnau tơl bơta pràn jak, bơngă pin dờn mờ bơta bơnĕ bơnài bal đah ală tiah; sền gròi broă ai kwang bàng tờm ngan tàm kấp sàh, lơh geh jơnau sồr kơnòl broă pa dê.

Broă tơmŭt bal 3 càr Lâm Đồng, Dăk Nông mờ Bình Thuận ờ mìng là dùl gùng dà broă lơh dờng nàng kờñ tơrmù di pal mpồl lơh broă, tơnguh uă cồng nha atbồ lơm, mờ gam là broă lơh kwơ màng wèt tus bơtàu tơnguh kơ̆ kơl jăp jŏ jòng tàm tiah đah Jum Tây Nguyên mờ tiah jat kềng gah dà lềng đah Jum tàm gùl lơgar. Ală bơta sền gròi tờm ngan bơh làng bol mờ kwang bàng dê bè tiah ơm, lòt rê, kung bè broă lơh mpồl cau, cau lơh broă neh geh đơng lam bồ ală tiah mờ Cíñ phủ iăt kơno, sồr lơh kràñ ngan. Mờ bơta dồ nùs bal, jơh nùs lơh ngan uă mờ nùs nhơm tam klăc bal, 3 càr gam hời rơ hời rcang nền nòn nàng lơh tus bơt bơtàu dùl broă lơh rơndăp tăp sèng pa, kơ̆ kơl jăp mờ geh cồng nha, lơh geh jơnau sồr bơtàu tơnguh tàm tơngai pa dê