Bi Pi Năng Thị R En ơm tàm sàh Khánh Trung, kơnhoàl Khánh Vĩnh là cơng tàng loh làng ngan tàm jơnau lik klàs rƀah tàm tiah làng bol jơi bơtiàn dồ êt nă cau tàm càr Khánh Hòa. Hìu bơnhă bi neh geh tŭ kis tàm hìu ing ồm sèt nhat dà mìu, pah tŭ mìu sơr pal dô pleh tiah ndai. Kơnờm broă lơh dong kờl lơh hìu ơm kơ̆ kơljap, bi R En tŭ do neh geh anih ơm lơngăp lơngai: “Geh dà lơgar dong kờl hìu ơm kơ̆ kơljap, ờ gam tai bơta nhăt dà mìu, ồm sèt tai. Hìu bơnhă ờ gam pal dô pleh hìu mè tai. Hìu bơnhă añ kung leng càn tai nàng lơh hìu jă brê. Geh dong kờl broă lơh dà lơgar jàu pà broă lơh sa, bol hi lơh ngan ròng phan, bơtàu tơnguh lơh sa, tơnơ̆ do geh rài kis kơ̆ kơljap rlau. Añ neh ròng bơh 2 nơm kơnrồ gơ deh gơs 10 nơm”.

Càr Khánh Hòa geh rlau 82 rbô nă cau jơi bơtiàn dồ êt nă cau, uă ngan là kòn cau Rơglai, tơrgùm uă ngan tàm 2 kơnhoàl là Khánh Sơn mờ Khánh Vĩnh. 4 nam do, Mpồl duh broă làng bol càr Khánh Hòa ai tơlik 15 jơnau lơh nền tàm pơrjum; Anih duh broă làng bol càr ai tơlik 33 jơnau lơh nền, 10 broă rơndap lơh mờ uă ngan sră nggal sồr lơh, đơng lam lam lơh broă lơh lời ai làng bol kòn cau tiah kơh bơnơm in. Tàm hơ̆, càr neh ai tơlik ală jơnau lơh nền tàm pơrjum krơi is ai gơnoar ală tiah ngui kes priă mờ priă jền dipal ndai nàng dong kờl tơn ai 2 kơnhoàl Khánh Sơn, Khánh Vĩnh in.

Tàm tŭ lam lơh broă lơh, càr sùm bơyai lơh sền sơ wì, jat sền tàm ală tiah nàng di tŭ tă bơsong kal ke, tơnguh mhar tơngai lam lơh broă lơh. Tơngai bơh nam 2021 tus nam 2025, kờp jơh priă lam lơh broă lơh geh rlau 970 tơmàn đong, tàm hơ̆ 85% ai bơh kes priă dà lơgar. Tŭ do, priă lơh geh kờp bal bơh làng bol jơi bơtiàn dồ êt nă cau dê gơguh uă rlau 2 dơ̆ pơndrờm mờ nam 2020, geh rlau 30 tơlak đong dùl nă cau dùl nam; khà hìu bơnhă rƀah gơmù 7,2% dùl nam. Càr neh tơn jơh geh rlau 1 rbô 130 nơm hìu ing, hìu ồm sèt nhăt dà mìu; lơh pa, lơh niam wơl git nđờ rhiang broă lơh drơng rài kis làng bol.

Tus tŭ do, 100% khà sàh geh gùng rơndeh oto tus tiah tàm gùl, jơh ală hìu bơnhă làng bol ndrờm geh ngui gùng che đèng mờ dà ngui sa sàng goh. Ồng Võ Nam Thắng, Kwang lam bồ Sờh Jơi bơtiàn mờ Jat yàng càr Khánh Hòa pà git, broă dong kờl lơh hìu pa mờ bơtàu tơnguh lơh sa dong làng bol gàr kơ̆ kơljap rài kis, lik klàs rƀah kơ̆ kơljap jŏ jòng sùm: “Bol hi bơyai lơh ai mpồl cau geh bơngă pin dờn lòt sền ală hìu măi tàm càr mờ bơdìh càr nàng tơnguh pràn jak mblàng yal. Mờ kung pơgồp bal mờ Hìu bơsram Cíñ trị bơto dà kòn cau ai kwang bàng tờm ngan tàm 2 kơnhoàl Khánh Sơn, Khánh Vĩnh mờ bàr pe tiah, sờh, gah broă lơh. Bol hi kung sơlơ bơto pơlam ai kwang đơng lam bồ in nàng dong khi git loh mờ jơh nùs lam lơh broă lơh jơnau kờñ dà lơgar tàm sàh”.

Pa do, 2 kơnhoàl tiah kơh bơnơm Khánh Sơn mờ Khánh Vĩnh neh geh Thủ tướng dờp là jơh rƀah. Jơnau lơh nền tàm pơrjum bơh Ƀộ Cíñ trị dê neh geh ngui tàm rài kis, pơgồp bơnah tơnguh jơnau git wă, lơh gơlik bơta tam gơl niam bè bồ tơngoh kơlôi sơnơng bơtàu tơnguh bơh làng bol tiah kơh bơnơm dê. Bơh bơta kơp gơn wơl, uă hìu bơnhă làng bol neh brồ guh is, khin cha tam gơl chi tam, bơtàu tơnguh lơh sa. Uă broă lơh sa suơn sre hưũ kơ, phan OCOP, tiah tam phan VietGAP, broă lơh wàng dờng ròng phan, mpồl lơh broă bal pa… gam rơhời geh lơh gơs mờ rề ơnàng.

Ồng Bùi Hoài Nam, Ƀí thư kơnhoàl Khánh Sơn pà git, tus tŭ do, ală tiah làng bol jơi bơtiàn dồ êt nă cau mờ tiah kơh bơnơm tàm càr neh lơh gơs ală tiah mìng tam dùl bơta phan bè tiah tam sầu riêng tàm Khánh Sơn geh 2 rbô 900 lồ: “Kơnhoàl Khánh Sơn jơh rƀah mơya ală broă lơh dong kờl lơh sa, bơtàu tơnguh lơh sa sùm geh sền gròi jat gùng dà lơh sa kơ̆ kơljap jŏ jòng sùm. Kơnhoàl Khánh Sơn gam tam gơl bơh tờm chi geh cồng nha tơnhàu lơyah nàng tam ală sơntìl chi tam geh cồng nha tơnhàu, bơta niam uă. Bol hi gam wèt tus jơnau mùl màl geh khà hìu bơnhă làng bol jơi bơtiàn dồ êt nă cau geh khà cau pas gơguh uă”.

Lời uă priă jền bơcri bơtàu tơnguh lơh sa – mpồl bơtiàn tiah làng bol jơi bơtiàn dồ êt nă cau mờ tiah kơh bơnơm tơngai bơh nam 2021 tus nam 2025, càr Khánh Hòa neh bơt bơtàu tiah kơh bơnơm bơtàu tơnguh bơnĕ bơnài, kơ̆ kơljap, bềng lìu bơta niam chài. Ală bơta dong kờl, broă lơh ờ mìng dong 2 kơnhoàl tiah kơh bơnơm jơh rƀah mờ gam lơh gơlik bơnàng jă bơtàu tơnguh jŏ tơngai, lơh gơs ală tiah gơn kơnờm pa, pơgồp bơnah lam lơh ngan ngồn jơnau kờñ bơtàu tơnguh tơl làm càr Khánh Hòa tus nam 2030, broă rơndap lơh tus nam 20245.

Ồng Nghiêm Xuân Thành, Ƀí thư Tỉñ ủy càr Khánh Hoà sồr tàm tơngai tus, ală tiah pal tơrgùm lam lơh niam broă bơcri kơlôi sơnơng, măi mok nàng lơh gơlik bơta tam gơl pa: “Pal tam gơl pa ngui măi mok tàm lơh broă sa suơn sre, ngui măi mok yal tơnggit jơnau, tam gơl sồ. Broă do den gơnoar atbồ pal lơh bal. Do là bơcri priă ngac ngar, ai làng bol tiah kơh bơnơm in broă lơh sa, ai tơl nă làng bol den kal ke ngan ală broă do. Jơnau kờñ là tơnguh priă lơh geh tàm bă ù lơh sa. Rơndap ù tiah pal lơh niam, tơrmù bơta aniai. Bơdìh mờ tờm sầu riêng pal tam tai tờm chi ndai, dong làng bol kơ̆ kơljap rài kis”.