Tổng Ƀí thư jờng rơ cồng nha bơtàu tơnguh bơh 2 càr dê, mơya đơs loh bơta bơrkuăt bal đah Kiên Giang mờ An Giang ờ hềt lơh geh cồng nha, bulah ơm rềp bal tàm tiah kuơmàng đah jum mat tơngai mut dà lơgar. Tổng Ƀí thư sồr tơmut bal 2 càr nàng lơh gơs dùl càr bơtàu tơnguh pa geh broă lơh sa dờng, tiah ơm kis li la mờ bơta pràn tàm tơrbŏ bal ù tiah geh cồng nha rlau. Broă tơrgùm dùl do kung lơh gơlik bơta niam nàng rơndap tap sèng wơl phan bơna, lơh gơs ală mpồl lơh bal bơh lơh gơlik phan tus tac hờ lơgar ndai, gơ hòi gơ jà bơcri priă jŏ jòng mờ tơnguh pràn jak tàm pơrlòng ù tiah. Tổng Ƀí thư sồr 2 càr tơrgùm lơh gơs ală broă jàu tàm tơngai lơh broă bơh nam 2020 tus nam 2025, rơcang lài nền nòn ai pơrjum dờng Đảng ƀộ ală kâp in, wèt tus pơrjum dờng gùt lơgar dơ̆ XIV bơh Đảng dê.