Tàm dơ̆ lòt còp, Thủ tướng ồng Phạm Minh Chính geh uă dơ̆ tìp mat mờ ală kwang đơng lam bồ kâp dờng bơh lơgar Thụy Điển dê, wă bàr pe mpồl lơh sa kă bro lơgar Thụy Điển pơn rơ gam geh ală broă lơh bơcri priă mờ kă bro tàm lơgar Việt Nam, tìp mat bàr pe nă cau kơlôi sơnơng, cau geh jơnau git wă jrô nàng tam pà bal ală broă lơh dờng bơh Cíñ phủ Việt Nam dê, tìp mat mờ tơm boh bơr mờ mpồl bơtiàn cau Việt Nam tàm lơgar Thụy Điển.

Bàr gah rơp tơrgùm cribơyai ală broă lơh sơlơ tơnguh bơta git gơp lơh broă bal jrô ơnàng mờ tơl làm tàm ală gah cíñ trị - cribơyai broă mờ lơgar ndai, lơh sa – kă bro – bơcri priă, kơlôi sơnơng jak chài – măi mok, tam gơl pa bơceh lơh, tam gơl sồ, bơto bơtê mờ bơsram, niam chài – tàp pràn să jan – lòt nhơl, bơtàu tơnguh kơ̆ kơljap jŏ jòng sùm mờ chồl tơnguh tìp mat lơh kwèng làng bol, pơgồp bơnah lơh niam rlau tai ală mpồl lơh broă bal gam geh tŭ do, ngui tai uă gah lơh broă bal geh bơta pràn, lơh gơlik ală tŭ niam pa ai lơh broă bal 2 lơgar in.