Di dơ̆ tus bal Pơrjum ờs mờng pah nam ală cau lam lài dơ̆ 16 bơh Cribơyai lơh sa dunia tàm Thiên Tân, lơgar Lo, drim ngai 25/06, (jat jiơ tiah do dê), Thủ tướng Cíñ phủ ồng Phạm Minh Chính neh tìp Thủ tướng lơgar Kyrgyzstan ồng Adylbek Kasimalyev. Thủ tướng Cíñ phủ ồng Phạm Minh Chính đơs nền, ală Ƀộ, gah broă Việt Nam gam jơh nùs lam lơh geh cồng nha ală jơnau ring bal neh geh Đơng lam bồ bàr lơgar ring bal sơlơ tơnguh tai tàm tơngume dơ̆ lòt còp bơh Thủ tướng lơgar Kyrgyzstan ồng Kasimalyev dê, jat hơ̆, Thủ tướng sồr bàr gah lơh pràn lơh broă bal lơh sa, kă bro phan, tàm tơrbŏ bal gùng rơndeh ồs đah bàr lơgar mờ bơh hơ̆ mờ ală lơgar tàm tiah tàm gùl câu Á dê.

Bàr gah ring bal sơlơ tơnguh tai cribơyai, tơm bơh bơr cíñ trị jrô ơnàng làm uă tàm ală kấp, is ồn là kwang bàng kấp dờng, mờ đah Cíñ phủ, ală ƀộ, gah broă, ală tiah bàr lơgar; pơgồp bal niam nàng lam lơh geh cồng nha ală jơnau ring bal neh geh Đơng lam bồ kấp dờng bàr lơgar ring bal sơlơ tơnguh; pơn jat tai pơgồp bal niam sơlơ tơnguh tai lơh broă bal tơl bơta, sơlơ tơnguh tai gĭt wă bal mờ gơ̆p đah làng bol bàr lơgar dê.