Ngai òr (06/08), Mpồl Mblàng yal bơto bơtê mờ Hòi jà làng bol Dà lơgar pơgồp bal mờ Đảng ủy Mặt trận Dà lơgar, ală mpồl lơh broă Dà lơgar, Đảng ủy Ƀộ Bơta chài măi mok pa, Đảng ủy Ƀộ Niam chài Tàp pràn să jan mờ Lòt nhơl mờ ală mpồl gơrềng bal bơyai lơh Pơrjum tìp măt 80 nă cau ala măt mpồl cau ngăc ngar, cau chài, cau đơs crih tamya tàm gùt lơgar.

Đơs tàm dơ̆ tìp măt, Tổng Ƀí thư ồng Tô Lâm tơlik nùs nhơm kah ưn ngài uă ngan tus mờ mpồl cau ngăc ngar, cau chài, cau đơs crih tamya tàm gùt lơgar tàm tơngai do sùm lơh broă bal mờ Đảng, Dà lơgar mờ jơi bơtiàn, git jơnau bal mờ iăt ală jơnau pơgồp bal jơh nùs bơh ală cau ala măt tus bal dơ̆ tìp măt. Tổng Ƀí thư kơ̆p kờñ tơngai tus mpồl cau ngăc ngar, cau chài, cau đơs crih tamya tàm lơgar dê pơn jăt tai tơnguh bơhiàn ờs mờng kwơ màng, lơh jơh bơta chài, bơta ngăc ngar, pơn jăt tai bơceh lơh uă broă lơh, jơnau cih dờng, geh kwơ, lơh broă bal mờ Đảng, Dà lơgar bal mờ làng bol lơh ngan bơ̆t bơtàu Dà lơgar ring lơngai, krơi is, pas gơs, pràn kơl dang, gơboh gơbài tàm rài pa.