Ngai 05/8, Anih duh broă Làng bol càr Gia Lai neh geh jơnau yal pơyua Mpồl sồr lơh ală broă lơh kuơmàng dà lơgar bơh càr dê in, yal bè broă rơcang lam lơh rơndap broă lơh bơcri priă lơh gùng ù gờl rơndeh lòt mhar Quy Nhơn – Pleiku. Jat jơnau yal co, càr Gia Lai neh rơcang sơn đờm lam lơh rơndap broă lơh tàm nhai 10 nam do. Mờ rơndap broă lơh gùng rơndeh lòt mhar Quy Nhơn – Pleiku, càr sồr ală mpồl geh jơng lam lơh lòt sền ù tiah, lơh broă lơh kờp dŭ drơng bơceh lơh gùng, sồr tam gơl broă lam lơh gùng lòt, gơl lòt gan kuèl An Khê nàng kờñ tơrmù khà rat, tơrmù lơyah tŭ tơngai lam lơh mờ tềm pềr priă tă lơh.

Rơndap broă lơh gùng rơndeh lòt mhar Quy Nhơn – Pleiku jòng mờr 125 kơi sồ, lòt gan càr Gia Lai, gùng geh 4 bơnàng rơndeh, rat rơndeh lòt geh bơceh lơh 100 kơi sồ dùl jơ, ală bơnah broă tàm ù, rbàng, ală gơl gùng tàm tìp, broă lơh gùng lòt ngac ngar mờ anih ơm wơl. Kờp jơh priă tă lơh jơh gùt rơndap broă lơh mờr 43 rbô 734 tơmàn đong, tàm hơ̆ càr Gia Lai hơ pơrgon ai 1 rbô 250 tơmàn đong bơh kes priă càr dê mờ ală bơnah priă bơcri dipal ndai ai broă lơh ai ù lơh rơndap broă in.