
Di tơnkah 10 nam crơng gơs Mpồl cau ala măt Quốk hội kơnòm să Việt Nam (bơh nam 2015 tus 2025), mho òr (24/06), tàm Hìu lơh broă Đảng Dà lơgar, Tổng Ƀí thư ồng Tô Lâm neh tìp măt Mpồl cau ala măt Quốk hội kơnòm să khoă XV.

Tổng Ƀí thư đơs sùm, Pơrjum dờng Đảng ală kấp wèt tus Pơrjum dờng cau ala măt gùt lơgar dơ̆ XIV Đảng dê, là kơnòl broă geh bơta kwơ màng jŏ jòng, nàng tơn jơh broă lơh tàm mùl màl, bơtơl jơnau cribơyai jơnau tàm sră pơ àr, mờ nàng săc rơwah ală kwang bàng tơl nùs nhơm niam – bồ tơngoh jak – jăk chài ai tơngai pa in. Mpồl cau ala măt Quốk hội kơnòm să pal pơn jăt tai pơgồp jơnau đơs tàm ală jơnau rơcang cih sră nggal, yal wơl mùl màl tàm kâp hơđơm mờ dan geh ală tam gơl pràn jŏ jòng bè broă tơrlòng lơh gơguh lơh sa, atbồ broă dà lơgar, bơtàu tơnguh kơl jăp, lơngăp lơngai ờ hềt geh bơh lài. Nàng lơh jăt broă lơh kwơ màng bơh he dê, Tổng Ƀí thư đơs nền, tơl nă cau ala măt Quốk hội kơnòm să pal sùm sền swì is să tờm, bơsram tàp, lùp bơsram bal mờ lơh broă sùm. Ală cau ala măt Quốk hội kơnòm să pal lài kung bè tơnơ̆ lơh jăt bơta niam kăc màng, dờn song mờ Đảng, mờ Dà lơgar bal mờ Làng bol; tơnguh gơnoar, lơh geh uă nùs nhơm tam gơl pa, ờ gơtìp nrơ̆t dơl tềng đăp mờ bơta kal ke, ờ gơtìp gơrềng tài bơta kwơ is, ờ lơh roh bơta niam să tờm tềng đăp mờ bơta bơchồt bơh gơnoar atbồ ha là bơta geh kwơ; khin kơlôi, khin lơh, khin tam gơl pa, khin dờp kơnòl.
Viết bình luận