Sàh Tu Mơ Rông (càr Quảng Ngãi) geh tơnggơs tàm bơta tơmŭt bal mpồl lơh broă sră pơ àr gơnoar ătbồ bơh 2 sàh Tu Mơ Rông mờ Đăk Hà (càr Kon Tum lài do dê). Tŭ do sàh geh 17 thôn, khà kờp làng bol mờr 6 rbô 500 nă. Đảng ƀộ sàh geh 26 ci ƀộ gơ wèt bal mờ rlau 300 nă đảng viên. Tơnơ̆ tŭ gơnoar ătbồ 2 kâp lơh broă, Đảng ủy sàh bơyai lơh tìp măt kwang bàng, kông cưk, viên cưk mờ 2 jơnau đơs  tờm geh đơs: “Kơnhăp bồ tơngoh, mpồl- Lơh jăt nùs nhơm tam klăc” mờ Tơngguh uă cồng drơng broă Làng bol in- Lơh pràn lơh tam gơl pa wơl sră pơ àr gơnoar ătbồ”.

Mờ Đảng ủy sàh mkung sơrbăc mhar rơcăng ai broă bơyai lơh Pơrjum dờng khoă XVIII, tơngai lơh broă bơh nam 2025- 2030 nàng lơh geh bơta tam gơl pràn tàm bơtàu tơngguh lơh sa- mpồl bơtiàn. Ồng Võ Trung Mạnh, Ƀí thư Đảng ủy sàh Tu Mơ Rông, pà gĭt: “Sàh pa gĭt nền bơtàu tơngguh phan bơna, drơng broă nàng wă năc lòt nhơl tus còp sền sươn kơnuh sơnơm Ngọc Linh, hơ̆ sồng bơyai lơh ală dar drà kơnuh sơnơm. Sàh kung neh gĭt nền ală bơta nàng bơtàu tơngguh lòt nhơl tàm ƀòn lơgar, bơtàu tơngguh lơh broă lòt nhơl sền gŏ tàm Đăk Chum 1. Sàh kung neh gĭt nền bơtàu tơngguh tờm chi lơh sơnơm là tờm ngan. Bơdìh mờ kơnuh sơnơm Ngọc Linh rơ̆p bơtàu tơngguh ală bơta kơnuh sơnơm ndai nàng lơh bơta ƀươn tàm pơndrờm, mơkung jăt tàm bơta hơ̆ sền gàr măt phan kă bro kơnuh sơnơm Ngọc Linh tàm ƀòn lơgar”.

Bal mờ lơh broă gơlòt sùm mpồl lơh broă gơnoar ătbồ, ală sàh tiah jơnhoa càr Quảng Ngãi gam tơnggŏ nùs nhơm rơcăng, sơrbăc mhar rơcăng sir tơl ai Pơrjum dờng Đảng ƀộ tơngai lơh broă pa bơh nam 2025- 2030, jăt di nùs nhơm sồr lơh bơh Tổng Ƀí thư ồng Tô Lâm dê tŭ geh dơ̆ lòt còp mờ lơh broă tàm càr. Hơ̆ là lơh jăt niam Jơnau sồr 45; rơcăng jơnau yal cíñ trị mờ bơta mùl màl tàm rài kis tơnơ̆ tơmŭt bal; geh bơta tờm, bơta wèt sền loh làng, gĭt nền geh ală broă tam gơl pràn, kơnòl broă tờm ngan mờ jơnau kờñ bơtàu tơngguh loh làng.

Ồng Nguyễn Đức Tuy, Phó Ƀí thư Tỉñ ủy càr, Củ tịc Mpồl duh broă Làng bol càr Quảng Ngãi, pà gĭt: “Jơnau yal cíñ trị tơnggŏ bơta tam gơl pràn, jơh nùs lơh ngan nàng lam lơh jăt tàm tơngai lơh broă tus. Ù tiah bơtàu tơngguh dờng rlau den gơnoar broă sàh dê tŭ do là pal lơh jăt mơya kơnòl broă dờng rlau tai. Gĭt loh tiah lơi geh gơnoar broă bè lơi cih tàm jơnau yal cíñ trị nàng lòt di gùng nàng bơtàu tơngguh mờ tơngguh uă rài kis phan bơna mờ nùs nhơm ai làng bol in, is ồn là tiah làng bol jơi bơtiàn dồ êt nă cau”.

Pơrjum dờng Đảng ƀộ ală sàh tiah jơnhoa Kon Tum gơ wèt càr Quảng Ngãi rơ̆p là tŭ niam nàng ală ƀòn lơgar in gĭt nền wơl bơta wèt sền bơtàu tơngguh, rwah di broă tam gơl pran, lơh niam geh bơta ƀươn kơnhoàl ù tiah ƀòn lơgar nàng lơh jăt geh jơnau kờñ bơtàu tơngguh mhar, kơ̆ kơl jăp tàm tŭ tơngai pa.