Bi Y Doăn Niê ơm tàm ƀòn A Lê A, sơnah ƀòn Ea Kao yal, broă tơmut VNeID tàm điện thoại ngac ngar bi dê neh geh lơh pơgap mờ do 2 nam mờ tŭ do neh tơnguh tus khà 2. Pa do, tơnơ̆ tŭ sơnah ƀòn geh tơrgùm dùl, broă lơh “Làng bol bơsram sồ” geh lam lơh tàm sơnah ƀòn, bi neh geh pơlam lơh ală sră pơ àr gơnoar atbồ tàm điện thoại mờ bi neh dan lơh is sră lòt rê hờ lơgar ndai ai kòn klau bi in rơcang lòt lơh broă tàm lơgar Hàn Quôk tàm lồi nam do: “Rơcang wil tơl ală bơta sră pơ àr, he lơh jat jơnau pơlam bơh kwang bàng lài hơ̆ dê là mut tàm mpồng yal tơnggit broă drơng ala bơh Ƀộ Kwang àng dê, hơ̆ sồng pơn jat tai mut tàm mat broă drơng ala dà lơgar mờ cih mat. Tơnơ̆ hơ̆, mut tàm bơnah broă drơng ala lơh sră lòt rê hờ lơgar ndai mờ cih wil tơl ală jơnau tơnggit sau dê tàm bơnah tong sră pơ àr tàm internet. Tơnơ̆ tŭ cih wil tơl den rơ wah bơnah tơm priă tàm internet bơh tài khoản mờ tong sră lòt rê hờ lơgar ndai tàm hìu. Jơh tơm priă de he kơp tơnơ̆ 15 ngai rơp geh dờp sră”.

Tơnơ̆ 3 poh lam lơh, broă lơh Làng bol bơsram sồ gam geh rề ơnàng dồ bă niam ngan tàm càr Dăk Lăk. Tàm uă sàh, neh crơng gơs ală jơnum măi mok sồ mpồl bơtiàn, mờ cau lơh broă tàm sàh lơh tờm nàng kờñ geh bơta ƀuơn pơlam tơl nă làng bol. Ồng Y Păm Byă, atbồ Jơnum măi mok sồ ƀòn H’ra Ea H’ning, sàh Dray Bhăng, càr Dăk Lăk pà git, tơnơ̆ tŭ geh bơto pơlam, ồng neh git loh mờ gơtùi pơlam làng bol tàm ƀòn lơh tàm internet ală bơta sră pơ àr gơnoar atbồ bè ù tiah, hộ tịc, lơh sơnơm, sền gàr rềs àr mpồl bơtiàn: “Añ rê tàm ƀòn rơp jà tơn ala mat bơh 430 hìu bơnhă tàm ƀòn tus Hìu pơrjum ƀòn nàng pơlam tơn, pơlam khi git ală bơta sră pơ àr gơnoar atbồ. Khi kung rơp pơn jat tai pơlam, mblàng yal ai ală cau ndai tàm hìu bơnhă he dê in bè ală sră pơ àr do. Bơh hơ̆, ngai sơlơ geh uă làng bol tàm ƀòn chài ngan lơh ală sră pơ àr gơnoar atbồ tàm internet mờ phần mềm VNeID”.

Càr Dăk Lăk đal git, măi mok sồ là bơnàng jă nàng bơt bơtàu gơnoar atbồ tơrmù lơyah, geh cồng nha. Bè hơ̆ den tàng, phan bơna sồ gam geh jal mhar lơh wil tơl gơ wèt mờ jơh ală sàh. Bal mờ hơ̆, broă lơh “Làng bol bơsram sồ” geh lơh pràn nàng tơnguh bơta chài làng bol dê tàm broă ngui ală phan ngac ngar.

Ồng Nghiêm Văn Chuẩn - Ƀí thư Đảng ủy sàh Dray Bhăng, càr Dăk Lăk pà git, sàh neh crơng gơs 24 jơnum măi mok sồ mpồl bơtiàn tàm 24 thôn, ƀòn. Jơnau kờñ mùl màl tàm nhai 8 do, tàm rlau 9 rbô 700 hìu bơnhă làng bol sàh dê, tơl hìu bơnhă ndrờm geh bơh 1 nă cau git loh ngui phan VNeID mờ lơh gơtùi ală sră pơ àr gơnoar atbồ kuơmàng tàm VNeID. Tus jơh nam 2025, gơtùi lơh tàm internet ală sră pơ àr gơnoar atbồ: “Jơnum măi mok sồ mpồl bơtiàn neh geh bol hi bơto pơlam chài ngan mờ crăp rơcang lòt tus tơl hìu nàng pơlam tơn ai ala mat tơl hìu bơnhă in git ngui, git mut tàm ală anih yal jơnau tơnggit sră pơ àr gơnoar atbồ làng bol dê tàm internet mờ điện thoại. Bơta kơp kờñ bol hi dê là ala mat tơl hìu bơnhă tus lồi nam 2025 rơp geh rlau 90% git ală broă lam lơh sră pơ àr gơnoar atbồ ƀuơn ngan rlau jơh tàm internet”.

Bulah lam lơh ờ hềt jŏ, broă lơh “Làng bol bơsram sồ” neh rơhời tơn jơh “tiah ờ geh sră pơ àr gơnoar atbồ sồ” tàm ală ƀòn càr Dăk Lăk dê. Bơta chài ngui măi mok sồ làng bol dê geh tơnguh niam, ờ mìng dong làng bol mhar git ală broă drơng ala dà lơgar tàm internet mờ gam lơh gơlik bơnàng jă nàng gơnoar atbồ bơt bơtàu mpồl lơh broă sră pơ àr gơnoar atbồ tơrmù lơyah, geh cồng nha. Bơta lòt bal, kơ̆ dơn mờ pơlam lơh tơn bơh ală jơnum măi mok sồ mpồl bơtiàn dê kung lơh gơlik bơta kơp kơnờm rơp geh ală rbàng tơrbŏ sồ kơ̆ kơljap đah măi mok, gơnoar atbồ mờ làng bol.