Jăt Mpồl ătbồ rơndăp broă lơh bơcri priă bơ̆t bơtàu càr Đồng Nai, rơndăp broă lơh bơnah 1 gùng rơndeh lòt mhar Biên Hoà – Vũng Tàu tơngai dơ̆ 1 geh bơta jòng 16 kơi sồ. Kờp jơh priă bơcri rlau 6 rbô 15 tơmàn đong ai bơh kes priă dà lơgar dê. Tus tŭ do, kờp priă khà phan rơndăp broă lơh bơnah 1 geh pơgăp rlau 46%. Rơndăp broă lơh geh lam lơh bơh nam 2022, digơlan lơh sir jơh tàm nam do 2025, ai ngui ndrờm bal jơh gùt gơl gùng tàm nam 2026. Tus tŭ do, broă lơh sờr ntrờn măt ù neh jơh lơh sir, tàm tiah lơh broă bơ̆t bơtàu gam geh 35 mpồl lơh hòi tơrgùm rlau 400 rơndeh rơndồ, măy mok mờ 440 nă cau lơh phan.

Tàm dơ̆ lòt sền, ồng Hồ Đức Phớc đơs sùm, ală mpồl lơh broă geh gơrềng, cau tờm lơh tơrgùm măy mok, cau lơh broă lơh mhar tơngai pơrgon lơh gơs, ngui jơh ală tŭ jiơ trồ tiah niam nàng tơngguh mhar lơh, nàng kờñ lơh sir rơndăp broă lơh jăt jơnau hơ lài mờ ngai 19/12/2025 do.