Rơndăp broă bơcri priă lơh gùng rơndah lòt mhar Bảo Lộc – Liang Khàng lòt gan ù tiah 10 sàh, sơnah ƀòn càr Lâm Đồng dê, lơh gơrềng tus rơlao 5 rơbô 400 hìu làng bol mờ 14 mpồl lơh broă, mờ kờp jơh bă ù pal toh wơl mờr 600 lồ, tàm hơ̆ geh ù lơh hìu ơm, ù lơh sa suơn sre, ù brê, ù sền gàr dà lơgar. Geh lơh tàm ngai 26 nhai 6 lài do, tàm tơngai pơn jăt tai lơh broă gơnoar atbồ bàr kấp dê mờ lơh jăt broă tơmŭt bal càr, rơndăp broă lơh do kong gơtìp mờ uă kal ke, gơkòl. Tàm sàh Ninh Gia, do là tiah geh rơlao 100 hìu làng bol gơrềng bal bơh rơndăp broă lơh do, ồng Võ Hữu Xuân, Củ tịc Anih duh broă Làng bol sàh pà git, kal ke sơnrờp ngan mờ sàh kong gơtìp là ờ tơl kwang bàng lơh broă tàm gah do nàng lơh broă tơm ntrờn ù tiah: “Broă ai bè kông cứk lơh broă tàm gah do bơh Cơl dŭ lơh broă gah Lơh sa ờ ndrờm bal, oh mi rơ̆p dờp broă lơh. Tàm broă pơlam lơh jăt kơnòl broă rơndăp ù tiah kung bè là priă ù gơtìp kal ke. Tŭ do gơkòl rơndăp ù tiah bal bơh ală sàh dê den tàng ờ hềt lơh jăt broă pơn jăt tai nàng lơh rơndăp broă lơh ƀòn ơm kis pa”.

Jăt ồng Nguyễn Thanh Chương, ala măt Mpồl Atbồ rơndăp broă bơcri priă bơ̆t bơtàu càr Lâm Đồng dê đơs, tơnơ̆ rơlao 1 nhai rơndăp broă geh sơn đờm mŭt lơh, kung là rơlao 1 nhai lơh broă gơnoar atbồ ƀòn lơgar 2 kấp, geh ờ uă jơnau pal jăt gơrềng tus mờ broă tơm ntrờn ù tiah kung gam ờ hềt geh tơrgùm; nhàr ù tiah tàm tiah lơh rơndăp broă lòt gan gơtìp tam gơl; broă ai priă ù mùl màl, lơh gùng dà broă lơh nàng tơm bơtơl, ală ƀòn ơm kis pa… ndrờm lơyài. Ồng Nguyễn Thanh Chương pà git, bal mờ bơsong gơkòl mờ ală broă gơwèt kơnòl bơh sàh dê, càr Lâm Đồng kung gam dan mờ Dà lơgar ai lài geh sùm broă dong kờl krơi is bè phan geh kwơ ù tiah nàng gàr niam broă lơh gùng rơndeh lòt mhar Bảo Lộc – Liang Khàng: “Tàm gơl gùng Bảo Lộc – Liang Khàng neh geh ai rơndăp ù tiah geh 11 bă ù geh phan kwơ tàm ù, tàm hơ̆ geh 4 tiah ù cò bồr, 1 tiah ù bràs mờ 6 tiah ù bal mờ lŭ nàng lơh rơndăp broă. 11 tiah ù do neh geh ai tàm Jơnau lơh nền tàm pơrjum 106 bơh Quốk hội dê bè tơrlòng lơh jăt broă lơh krơi is ai ală rơndăp broă lơh in. Jơnau lơh nền tàm pơrjum 106 geh ngui tus ngai 30 nhai 6, Anih duh broă Làng bol càr Lâm Đồng geh jơnau dan mờ Cíñ phủ mờ Quốk hội ai pơn jăt tai tơn jŏ Jơnau lơh nền tàm pơrjum 106 rơ̆p mhar rơlao lơh jăt Adăt phan kwơ geh is”.

Jăt broă rơndăp lơh neh geh ai bơh càr Lâm Đồng dê, tơngai lơh gùng rơndeh lòt mhar Bảo Lộc – Liang Khàng là 30 nhai. Nàng lơh di mờ tơngai neh geh ai do, kwang đơng lam bồ Anih duh broă Làng bol càr Lâm Đồng sùm tus sền, sền gròi, sồr lơh bơsong gơkòl ai rơndăp broă lơh do in. Mờ tơnguh kwang bàng lơh broă gah do kấp càr tus dong kờl kấp sàh; mhar lơh geh Mpồl Atbồ rơndăp broă lơh Gùng lòt càr; Anih tờm Bơtàu tơnguh bă ù càr; Mpồl Atbồ rơndăp broă lơh sa Suơn sre càr… nàng lơh ală tơngu me tàm gah broă do. Ồng Hồ Văn Mười, Phó Ƀí thư Tỉñ ủy, Củ tịc Anih duh broă Làng bol càr Lâm Đồng pà git, gơwèt mờ ală rơndăp broă lơh tờm càr dê, tàm hơ̆ geh rơndăp broă lơh gùng rơndeh lòt mhar Bảo Lộc – Liang Khàng, broă tơm ntrờn ù tiah geh sền là gùng dà broă lơh tờm ngan: “Bol añ sùm kơlôi rơcang broă do. Gùng dà broă lơh hơ̆ là broă mblàng yal, lam lơh nàng làng bol in wă geh ală broă lơh tờm, ală gùng rơndeh lòt mhar do rơ̆p cèng geh bơta kwơ lơi ai làng bol in tŭ tơm ntrờn ù tiah, pal di nùs, di mờ adăt boh lam. Bol añ neh geh jơnau dan mờ Tỉñ ủy lơh geh Mpồl Sồr lơh nàng bơsong ală broă lơh tờm, tàm hơ̆ geh lơh Mpồl Sồr lơh tơm ntrờn ù tiah mờ dan ồng Ƀí thư Tỉñ ủy rơ̆p là cau Lam bồ mpồl do mờ rơ̆p dan ală kwang bàng tàm Mpồl Lơh kơnòl broă sùm Tỉñ ủy, ală kwang bàng Tỉñ ủy tàm nùs nhơm là tơl nă kwang bàng pal dờp kơnòl sền, jăt sền tơrgùm sồr lơh broă tơm ntrờm ù tiah”.

Tơrmù kal ke, gơkòl tàm tơngai pơn jăt tai, lơh broă gơnoar atbồ ƀòn lơgar bàr kấp, càr Lâm Đồng gam tơrgùm bơsong gơkòl ai ală broă lơh, rơndăp broă lơh tờm nàng lơh pràn lơh sa mpồl bơtiàn bơtàu tơnguh. Mìng is gơwèt mờ Rơndăp broă bơcri priă lơh gùng rơndeh lòt mhar Bảo Lộc – Liang Khàng, ală sờh, gah lơh broă tàm càr mờ 10 sàh, sơnah ƀòn tiah geh gùng rơndeh lòt mhar lòt gan tơrgùm uă ngan ai broă tơm ntrờn ù tiah. Ală măt Cau bơcri priă lơh gơl gùng rơndeh lòt mhar Bảo lộc – Liang Khàng pà git, rơwah cau bơcri priă lơh rơ̆p lơh gơs tàm nhai 11 mờ sơn đờm mŭt lơh  gùng rơndeh lòt mhar tàm ù tiah mùl màl.