Cribơyai là broă lơh gơ ơm tàm tơngume ală broă lơh tơngkah kir sơnrai ală ngai lơh chờ dờng bơh Dà lơgar dê, di dơ̆ tơngkah kir sơnrai 80 nam Kăc màng Nhai 8 mờ Ngai Sơntờm Dà lơgar 2/09.

Đơs đơng lam tàm dơ̆ Cribơyai, Phó Thủ tướng Duh broă sùm Cíñ phủ ồng Nguyễn Hoà Bình đơs sùm: Cribơyai là dơ̆ nàng bol he in sền wơl dùl gùng lòt tiơng pơn rơ ngan bơh kah yau jơi bơtiàn dê, bal mờ bơta pơn yờ să bè ală cồng nha pơn rơ ngan mờ jơh gùt Đảng, jơh gùt làng bol mờ jơh gùt ling klàng he dê neh lơh geh mờ wèt rê bal mờ rài tơnơ̆ do àng niam bơh Dà lơgar dê. Kờp bơh Kăc màng nhai 8 nam 1945, kah yau gam geh cih tai dờng màng ngan. Rài lơngăp lơngai is, khat gơboh neh tàm pơr dờn mờ rài tơrgùm gùl Dà lơgar, ring lơngai, bơtàu tơnguh mờ rơ̆p geh pơn jat tai mờ rài brồ să, sơlơ bơtàu tơnguh tai, mờ pas pràn.