Tàm dơ̆ tìp mat, Tổng Ƀí thư ồng Tô Lâm đơs nền Việt Nam crăp rơcang là rbàng tàm tơrbŏ đah lơgar Hungary mờ tiah đah Jum mat tơngai Lik câu Á dê mờ sền Hungary là mpồng mut kwơ màng nàng sơlơ tơnguh tai lơh broă bal mờ tiah đah mat tơngai lik tàm gùl câu Âu mờ EU dê.

Bàr nă kwang đơng lam bồ ring bal pơn jat tai sơlơ tơnguh rlau tai bơta pin dờn cíñ trị mờ tam klăc bal đah 2 lơgar, 2 đảng at gơnoar, sơlơ tơnguh tai tàm pơgơl mpồl kwang bàng kấp dờng mờ ală kấp, lơh pràn lơh broă bal tàm bơta tờm kă bro phan, bơcri priă, jak chài- măi mok, tam gơl pa bơceh lơh, bơto bơtê mờ bơsram... đơs sùm sền gàr Dà lơgar- lơngăp lơngai pal gơ gơs bơta tờm pa tàm lơh broă bal 2 lơgar dê mờ 2 gah kờñ pal lơh pràn tìp mat lơh kwèng làng bol, pơgồp bơnah sơlơ tơnguh tai bơta wă wờng bal mờ gơ̆p đah 2 jơi bơtiàn dê. Bàr nă kwang đơng lam bồ ring bal Việt Nam mờ Hungary kờñ nùs nhơm bơsong ală bơta tam pìt tam phà mờ broă lơh ring lơngai, jat tàm ală bơta sền dờng màng adat boh lam ală lơgar, pơgồp bơnah gàr niam ring lơngai, kơ̆ kơl jăp, lơngăp lơngai tàm tiah do mờ tàm dunia.