Tơngai pa do, Tỉñ ủy càr mờ Anih duh broă Làng bol càr Lâm Đồng neh ai lơh jat uă Jơnau sồr, Sră nggal sồr lơh, sồr ngan ală anih lơh broă, mpồl lơh broă, ală kơnhoàl, ƀòn dờng tàm càr tơrgùm tơl bơta pràn lơh mhar tŭ tơngai ai priă jền, gờñ lơh sir broă ai ù nàng lam lơh mut lơh ală broă lơh bơt bơtàu, rơndăp broă lơh... Mơya, tus tơngai tŭ do, broă lơh ai priă bơcri dà lơgar bơh càr Lâm Đồng dê kung gam lơh geh lơyah, mìng pa lơh jat geh 1 rơbô 446 tơmàn đong tàm kờp jơh rlau 9 rơbô 340 tơmàn đong, lơh geh khà 15,5% jat broă rơndăp lơh.

Tàm pơrjum, Củ tịc Anih duh broă Làng bol càr Lâm Đồng ồng Trần Hồng Thái đơs là, tŭ tơngai ai priă bơcri Dà lơgar tàm ù tiah càr dê lơh geh lơyah bè do là ờ gơ tùi dờp ngan. Ồng sồr đơng lam bồ ală tiah sền gròi lơh mhar tŭ tơngai, pal lơh kràñ cê jơh nùs ngan broă ai ù nàng ală rơndăp broă lơh in gơtùi lam lơh ai geh priă bơcri, tàm hơ̆ is ồn tơngkah ală rơndăp broă lơh gùng rơndeh lòt mhar.