Tổng Ƀí thư ồng Tô Lâm mờ Thủ tướng ồng Aleksandr Turchin dồ nùs bal đơs là gĭt gơ̆p 2 lơgar gam ơm tềng đăp tŭ tơngai niam pa, đơs nền 2 lơgar pal lơh jăt pràn kơldang bơnàng jă bơhiàn ờs mờng bơh yau nàng rề ơnàng lơh broă bal ngan ngồn, geh cồng nha. Bàr đah rơ̆p lơh dùl broă lơh lơh broă nàng lam lơh jăt gĭt gơ̆p Tam klăc lơh broă bal jŏ jòng nàng tơngguh kâp, sơlơ tàm pơgơl mpồl kwang bàng kâp dờng mờ ală kâp lòt còp bal mờ gơ̆p, chồl tơngguh gĭt gơ̆p lơh sa, kă bro phan ndrờm pal mờ gĭt gơ̆p tam klăc lơh broă bal jŏ jòng, tơngguh tai lơh broă bal lơh sa mờ măy mŏk, tàm hơ̆ geh lơh gơlik rơndeh ô tô mờ măy hoài, lơh broă bal jak chài- măy mŏk, bơto bơtê mờ bơsram, niam chài, lòt nhơl, tìp măt lơh kwèng làng bol, sơlơ tìp măt lơh kwèng bal rơnàng kơnòm să nàng prăp gàr, tàm pơn jăt tàm pơdờn bơhiàn ờs mờng gĭt gơ̆p lơh bơyô, lơh broă bal ờs mờng bơh yau.

Cribơyai bè ală broă kơnhoàl ù tiah do mờ ală lơgar sền gròi bal, 2 đah đơs nền rơ̆p pơn jăt tai lơh broă bal kơ̆ kơl jăp tàm ală anih cribơyai kơnhoàl ù tiah mờ ală lơgar, kờñ bal ală jơnau pal jăt tờm ngan bơh adăt boh lam ală lơgar dê, tă pơgồp jơh nùs ai broă gàr ring lơngai, kơ̆ kơl jăp, lơh broă bal mờ bơtàu tơngguh tàm kơnhoàl ù tiah do mờ tàm dunia.