Mpồl Duh broă Đảng Kộng sản Việt Nam, Quôk hội lơgar Kộng hoà Sàh hội Củ nghĩa Việt Nam, Củ tịc lơgar Kộng hoà Sàh hội Củ nghĩa Việt Nam, Cíñ phủ lơgar Kộng hoà Sàh hội Củ nghĩa Việt Nam, Anih duh broă Mặt trận Dà lơgar Việt Nam mờ hìu bơnhă pơlai soh kah sơnđàc ngan gĭt lơh dan yal: Ồng Trần Đức Lương, lài do Kwang bàng Ƀộ Cíñ trị, Củ tịc lơgar Kộng hoà Sàh hội Củ nghĩa Việt Nam, Củ tịc Mpồl duh broă Sền gàr dà lơgar mờ Lơngăp lơngai, deh ngai 05 nhai 05 nam 1937; ƀòn tờm: sàh Phổ Khánh, kơnhoàl Đức Phổ (tŭ do là ƀòn drà dờng Đức Phổ), càr Quảng Ngãi; ơm kis sùm tàm hìu sồ 298 gùng drà Vạn Phúc, sơnah ƀòn Liễu Giai, kwận Ba Đình, ƀòn dờng Hà Nội.

Ồng lơh broă kăc màng bơh nhai 02 nam 1955; mŭt Đảng Kộng sản Việt Nam ngai 19 nhai 12 nam 1959; Kwang bàng Mpồl duh broă Đảng Dà lơgar ală khoă V, VI, VII, VIII, IX; Kwang bàng Ƀộ Cíñ trị khoă VIII, IX; Kwang bàng Duh broă sùm Ƀộ Cíñ trị khoă VIII; Phó Củ tịc Mpồl duh broă Ƀộ trưởng bơh nhai 02 nam 1987 tus nhai 09 nam 1992; Phó Thủ tướng Cíñ phủ bơh nhai 10 nam 1992 tus nhai 08 nam 1997; Củ tịc lơgar Kộng hoà Sàh hội Củ nghĩa Việt Nam, Củ tịc Mpồl duh broă Sền gàr dà lơgar mờ Lơngăp lơngai, khoă X, khoă XI; cau ala măt Quôk hội ală khoă VII, VIII, X, XI.

Tơnơ̆ dùl tŭ tơngai gơbàn kòp kơn jơ̆, bulah neh geh Đảng, Dà lơgar, mpồl ală cau pơgru dờng, cau lơh sơnơm jơh nùs dong kờl sơm kòp, hìu bơnhă jơh nùs sền gàr trăng gàr mơya tài bơh sơnam dờng, kòp kơn jơ̆, ồng neh sang rài tàm tŭ 10 jiơ 51 phuk mang, ngai 20 nhai 05 nam 2025 (hơ̆ là ngai 23 nhai 04 nam Ất Tỵ), tàm hìu is, kis jŏ 88 sơnam.

Tàm rlau 50 nam lơh broă kăc màng, ồng neh geh uă tă pơgồp dờng ngan gơ wèt mờ broă lơh kăc màng pơnrơ ngan bơh Đảng mờ bơh jơi bơtiàn dê. Ồng geh Đảng, Dà lơgar pà jờng Huân cương Sơmañ rơmĭt, Sơlong 65 nam sơnam Đảng mờ uă huân cương, huy cương, phan ƀàn, sră jờng rơ kwơmàng ndai. Ồng roh tĕ là dùl hoàc hươr dờng ngan gơ wèt mờ Đảng, Dà lơgar, Làng bol he mờ hìu bơnhă Ồng dê.

Nàng tơnggŏ nùs nhơm pơlai soh kah sơnđàc mờ kah kơlôi ồng Trần Đức Lương, Mpồl Duh broă Đảng Kộng sản Dà lơgar Việt Nam, Quôk hội lơgar Kộng hoà Sàh hội Củ nghĩa Việt Nam, Cíñ phủ lơgar Kộng hoà Sàh hội Củ nghĩa Việt Nam, Anih duh broă Mặt trận dà lơgar Việt Nam lơh nền bơyai lơh pơrjum ies tơ̆p ƀồc Ồng bal mờ broă lơh Pơrjum Dà lơgar ies tơ̆p ƀồc.

MPỒL DUH BROĂ ĐẢNG KỘNG SẢN DÀ LƠGAR VIỆT NAM

QUÔK HỘI LƠGAR KỘNG HOÀ SÀH HỘI CỦ NGHĨA VIỆT NAM

CỦ TỊC LƠGAR KỘNG HOÀ SÀH HỘI CỦ NGHĨA VIỆT NAM

CÍÑ PHỦ LƠGAR KỘNG HOÀ SÀH HỘI CỦ NGHĨA VIỆT NAM

ANIH DUH BROĂ MẶT TRẬN DÀ LƠGAR VIỆT NAM