
Tŭ geh cau krơi tus hờ hìu, ùr bơklau bi Y Nhua, ƀòn Kon Rôn, sàh Ngọk Réo, càr Quảng Ngãi wă rò mờ muh măt gơlơh rơngòt ngan. Tŭ neh gĭt loh jơnau kờñ bơh cau lơh ƀăo dê kờñ yal tơngkah lài bè rềs àr ma túy gơ aniai, bi Y Nhua yal bè kòn klau gam lơh jăt kơrnoăt lơh glài bơh anih cah rña dê jàm 9 nam bè tìs lam ngui tìs mờ adăt boh lam sơnơm ma túy. Tơngai kòn klau bi dê gơtìp kŭp, jơh dùl hìu bơnhă nrơ̆t ndơl ngan tài bơta geh ngan jê nùs jê tồr ngan sơrlèt rlau mờ jơnau kơlôi. Tŭ do kòn klau lòt jàm, kòn ƀan kơnđu kòn rê hờ hìu mè bèp tờm dê tàm sàh ndai, rài kis hìu bơnhă bi Y Nhua gơ tàm sơrlŭ jơh: “Khải kòn añ bơh dềt cau lơi kung gĭt lơm ngai lơi kung lòt lơh broă ñcau mờ gĭt bè hơ̆. Tŭ khai gơtìp cah rña khai ñìm đơs mè rơngòt ngan. Bol hi kung mờr chơ̆t yơh tơn ya sơl. Tŭ do, mìr sre ờ geh nùs nhơm lơi tai mờ lơh”.

Ƀòn Kon Rôn geh 236 hìu làng bol bal mờ jơh ală là làng bol jơi bơtiàn Sơdàng ơm kis. Ƀòn lơgar sùm lơngăp lơngai niam bơnĕ bal mờ uă bơta kwơ niam chài ờs mờng bơh yau, làng bol tơryăng tơryồng lơbơn niam, tŭ do rềs àr ma túy gơ tơn ño sùm, lơh tơn roh bơta lơngăp lơngai. Mò Y Nhĩ, mờr 60 sơnam, bè cau dê den neh ờ bòl glar kal ke tài bơh 2 nă kòn neh jơh dờng mơya mùl màl sơlơ bòl glar kal ke ngan rlau tŭ kòn klau 32 sơnam, gơtìp kŭp jàm tài ma túy: “Mè kung ờ gĭt, bèp kung ờ gĭt sơl. Tŭ cau kŭp sơnđàc ngan. Añ ơm tàm hìu gơtìp kòp jê uă ngan, gơtìp huyết áp gơguh uă kơ̆p kờñ kòn rê gờñ. Bàr pe nă bol kơnòm tàm ƀòn do bañ lòt jăt gùng hơ̆ tai. Pal ơm tĕ tàm hìu lơh broă mờ mè bèp, dong kờl mè bèp”.
Ală ù tiah ƀòn lơgar càr Quảng Ngãi pa (càr Kon Tum yau) geh rlau 100 nă cau ngir ma túy, rlau 600 nă cau ngui tìs mờ adăt boh lam sơnơm ma túy mờ rlau 3 rbô 300 nă cau pin ngui tìs mờ adăt boh lam sơnơm ma túy. Do kung là dùl tàm ală jơnau bơh tài lơh tơn roh bơta lơngăp lơngai tàm ală thôn ƀòn mờ lơh gơlik ală rềs àr mpồl bơtiàn. Đal gĭt loh rềs àr gơ aniai, nhai 04 pa do, Anih duh broă Làng bol càr Kon Tum yau neh ai lơh jăt Broă rơndăp lơh sồ 1118 bè bơ̆t bơtàu broă lơh tơrlòng lài “Sàh, sơnah ƀòn, ƀòn drà ờ geh ma túy” mờ ală sàh gam sơrbăc mhar lam lơh jăt broă lơh tơrlòng lài do. Mò Phạm Thị Mây, lài do Củ tịc Anih duh broă Làng bol sàh Ngọk Réo, pà gĭt, broă lơh do neh mờ gam tàm pơn jăt tai lơh nàng kơryan rềs àr gơ aniai mờ ƀòn lơgar.
“Sàh kung neh lam lơh broă lơh tơrlòng thôn ờ geh ma túy. Hòi tơrgùm ală mpồl cau, ală mpồl, gah, mpồl cau mŭt lơh bal nàng mblàng yal hòi jà ơruh pơnu kơnòm pa tàu kơnòm dềt pleh ngài ma túy. Sàh kung dan mờ ală anih lơh broă geh gơnoar tơngguh tai broă lơh ătbồ, pơgồp bal mờ gơnoar ătbồ ƀòn lơgar gĭt nền ală cau, is ồn là lùp khàu, lơh loh mờ kŭp kơryan jơh ală broă lơh tăc blơi, lam lơh, ngui tìs mờ adăt boh lam sơnơm ma túy”.

Ma túy gam ndơ̆p ndơr gơ lòt mŭt tàm ƀòn, rơsìh bơta jê sồt muăt jrùm mờ lơh tơn roh bơta lơngăp lơngai niam bơnĕ tàm uă ƀòn lơgar càr Kon Tum yau dê. Ală dà măt hòr bơh mè bèp dê, ală sră lơh glài bơh aniai cah rña dê lời ai cau kơnòm gơtìp gơhoài tơmŭt tài bơh ma túy là jơnau đơs yal tơngkah lài ai jơh gùt mpồl bơtiàn in. Dơ̆ tam lơh rơcăng dră wơl ma túy tàm ală ƀòn lơgar Quảng Ngãi pa (càr Kon Tum yau), gam geh bơta mŭt lơh bal ndrờm bal bơh ală kâp, ală gah dê mơya kờñ rlau tai là gĭt wă rơcăng ngăc bơh tơl nă làng bol dê.
Viết bình luận