VOV4.K’ho - Pơn jăt tai prjum, drim òr (07/6), Quốc hội cri bơyai tào hìu pơrjum dờng bè broă mu\t bal Công ước sồ 98 bơh Mpồl lơh broă dunia tus ngui ală kơrnoăt bơh gơnoar bơyai lơh mờ cri bơyai mpồl bal.

Công ước sồ 98 geh 3 tơngu me tòm: sền gàr cau lơh broă mờ công đoàn tềng đăp mờ ală broă tam cah is broă lơh, tam dră mờ công đoàn bơh ca ngui cau lơh broă; sền gàr mpồl lơh broă bơh cau lơh broă ờ gơtìp sơmờm, gơgràm tài bơh cau ngui cau lơh broă; ală broă chồl pràn cri bơyai mpồl lơh is, geh nùs nhơm.

Tàm bơta lơgar Việt Nam gam tơnguh tơrgùm lơh sa mờ dunia, broă mu\t bal mờ lơh jăt Công ước sồ 98 geh ai tơngu me adăt boh lam cau lơh broă bal mờ cau ngui cau lơh broă geh cri bơyai mpồl bè priă nhai mờ ai geh ală bơta broă lơh ndai tàm broă lơh bal lơh broă bè: lơh tai jơ, dơ\ sào tàm gùl tơngai lơh broă mờ ală broă geh kuơ ndai…

Cau mblàng Ndong Brawl