Tơnơ̆ 50 nam dà lơgar tơrgùm dùl, broă lơh bơceh jơnau cih niam đơs crih tamya tàm càr Dăk Lăk geh tai uă jơnau pa geh bơta niam uă, đơs uă nùs nhơm kờñ gơboh dà lơgar mờ geh uă bơta kờñ gơboh kòn bơnus, lơh geh bơta niam chài krơi is bơh ală jơi bơtiàn dê. Càr neh jòi geh mờ kờp geh git nđờ rơhiang jơnau yal yau kòn cau Rơđê mờ Mnông, git nđờ rơbô jơnau răc dan tàm ală dơ̆ lơh yàng bơh làng bol dê.

Pà git nđờ rơhiang pang cing mờ phan soh ờs mờng; lơh geh wơl, bơyai lơh uă broă lơh chờ ờs mờng, pơgồp bal mờ broă prăp gàr bơta niam chài mờ bơtàu tơnguh lòt nhơl. Jơnau geh uă bơta tàm bơta niam chài bơh ală jơi bơtiàn dê neh lơh geh tàm càr Dăk Lăk bơtàu tơnguh uă bơta niam chài đơs crih tamya. Ồng Nguyễn Văn Cừ, Lam bồ mpồl mblàng yal bơto bơtê mờ Hòi jà làng bol Huyện ủy kơnhoàl Ea Súp đơs là, broă prăp gàr mờ ngui ală bơta kwơ niam chài ờs mờng nàng bơtàu tơnguh jơnau cih đơs crih tamya, kung pal pơgồp bal broă bơtàu tơnguh lòt nhơl mờ lơh sa. “Ai bơta niam chài lơh sa mờ pơn jăt mờ hơ̆ den ai bơta niam chài ròng bơta niam chài. Bơ̆t bơtàu lòt nhơl kơnhoàl Ea Súp, lòt sền tơnao Ea Súp thượng, ñrùh Giang Prong, còp làng bol 5 ƀòn tàm ƀòn drà dềt Ea Súp bal mờ bòr cing mồng drơng phan sa, niam chài, lơh chờ pơgồp bal nàng làng bol bơtàu tơnguh lơh sa hìu nhă, bơh tŭ hơ̆ ai geh dùl dar lòt pơn jăt tai, hơ̆ là lơh sa, niam chài, cíñ trị mờ mpồl bơtiàn bơtàu tơnguh mờ kơ̆ jăp”.

Ồng Trần Doãn Tới, Phó lam bồ mpồl Mblàng yal mờ Hòi jà làng bol Tỉñ ủy càr Dăk Lăk pà git, pơn jăt tai lơh jăt ală cồng nha, càr pơn jăt tai lơh ală kơnòl, broă lơh nàng ai geh gùng dà broă bơtàu tơnguh jơnau cih niam đơs crih tamya tàm tơngai pa. “Mpồl Mblàng yal bơto bơtê mờ Hòi jà làng bol Tỉñ ủy rơ̆p pơn jăt tai pơlam Tỉñ ủy nàng geh jơnau sồr di tŭ, bơh tŭ hơ̆ lơh niam rơlao tai Jơnau lơh nền sồ 23 bè jơnau cih văn đơs crih tamya. Mờ tŭ he mŭt tàm dùl rài brồ să, tơrgù bal bè đah ù tiah, di gơlan là rơ̆p geh uă broă tam gơl pa rơlao bè đah jơnau cih văn mờ đơs crih tamya mờ niam chài, lơh jăt mờ đờm jăt bơta pràn tơrgùm bal niam chài bơh tiah kơh bơnơm bal mờ broă tơrgùm bal tàm broă cih jơnau văn đơs crih tamya bơh ù tiah đah jum jăt gah dà lềng tàm gùl lơgar dê mờ he bơyai lơh tơrgùm bal”.

Wèt tus rài bơtàu tơnguh pa, broă pơgồp ndrờm bal đah niam chài đơs crih tamya mờ lơh sa, tàm hơ̆ uă ngan là lòt nhơl, rơ̆p pờ geh ală dơ̆ niam uă ai càr Dăk Lăk in bơtàu tơnguh kơl jăp, prăp gàr phan lời wơl mờ lam geh nùs nhơm bơceh lơh. Bơh bơta tờm rài lài do, niam chài uă bơta mờ nùs nhơm kờñ gơboh dà lơgar uă, jơnau cih văn đơs crih tamya tŭ do pơn jăt tai brồ guh ngài, pơgồp bal tàm broă bơ̆t bơtàu dùl Tây Nguyên pas gơs mờ niam bơnĕ.