“Kwang bàng lòt B” là jơnau pơrya geh ngui nàng đơs bè ală kwang bàng bơh tiah đah tô dà lơgar mờ nùs nhơm tus bal is sơrlèt gan Trương Sơn mut tàm tiah đah tô dà lơgar tus bal tam lơh tơngai bơh nam 1965 tus nam 1975. Tàm dơ̆ bơyai lơh tàm càr Gia Lai, tàm nùs nhơm ki ngàm mờ ngoh rơngac, 11 nă kwang bàng lòt B mờ cau pròc mhàm tờm bơh 22 nă kwang bàng ndai dê neh dờp wơl jơh ală sră nggal geh prap gàr nền nòn ngan tàm rlau 50 nam.

Ală phan lời kir hơ̆ geh: ƀằng kâp, sră pơyua cih mờ tê, gai lòng, sră tềm pềr halà sră kim ta… là jơtài mờ ală kwang bàng, cau geh bồ tơngoh bơsram sră tiah đah tô dà lơgar pơyua wơl tàm Mpồl Tơrgùm dùl dà lơgar, tŭ tus bal is mut tàm tiah đah jum dà lơgar tài nùs nhơm kac màng. Do là ală tềl cơng tàng niam ngan bè bơta jơh nùs mờ bơta pin dờn kơ̆ ngan tàm gùng dà tơngklàs jơi bơtiàn mờ dùl rài “lòt gùng” tài dà lơgar dê.

Ồng Phạm Văn Nguyên (82 sơnam), dùl nă cau pơgru geh sồr mut tàm tiah đah jum dà lơgar nam 1972 ngoh rơngac ngan tŭ ià tàm tê ală phan lời kir bơh tŭ tơngai gam pơnu dê: “Bal mờ añ nam hơ̆ geh 5 nă oh mi sơn đờm lòt bal 1 ngai. Tŭ do dờp sră nggal, añ ngoh rơngac ngan. Bơyô lòt bal mờ añ geh cau den neh sang rài, ờ git ờ gơtùi dờp halà ờ. Sră nggal do là phan lời kir ờ gơtùi huĭ gơ wèt mờ añ. Añ neh ơm tàm Gia Lai 53 nam, tŭ do geh rê wơl ndo den là bơta chờ hờp dờng ngan añ dê”.

Tơnơ̆ dơ̆ jàu wơl sră nggal, càr Gia Lai mut lơh ràng tơlik “Ntàu guh tiah ù Bazan”. Geh lơh tus jơh ngai 30/4 do, ràng tơlik ai gŏ wơl tŭ tơngai tam lơh mờ bơt bơtàu bơh ling klàng, làng bol càr Gia Lai dê bơh tơnơ̆ Jơnau kĭ hơ Geneva nam 1954 tus tŭ do. Ràng tơlik geh tam pà gơs 2 bơnah là “Lòt gan nhŭ ồs tam lơh” mờ “Brồ să tàm nggùl ù tiah brê bơnơm dờng ơning ơnàng”. Bơh hơ̆ ai gŏ wơl git nđờ rhiang sră nggal, rùp hin kuơmàng ngan bè tŭ tơngai tơngklàs càr Gia Lai (17/3/1975) mờ tơngklàs tiah đah jum (30/4/1975) kung bè ală broă lơh ngan bơt bơtàu wơl mờ bơtàu tơnguh bơh càr Gia Lai dê, bơh dùl càr tiah kơh bơnơm kal ke rơhời gơ gơs là càr geh khà gơguh lơh sa pràn.

Ồng Đỗ Xuân Quý, dùl nă cau pròc mhàm tờm kwang bàng lòt B dê neh bal mờ 4 rơnàng tàm hìu bơnhă tus bal dơ̆ ràng tơlik mờ uă bơta ngoh rơngac: “Añ ngoh rơngac ngan. Añ lam jơh hìu bơnhă, kòn sau tus ndo nàng khi in git bơhiàn ờs mờng bèp ồng dê bè lơi, nàng pơn jat tai đòm jat nàng sền gàr dà lơgar Việt Nam ngai sơlơ kơ̆ kơljap, kis jŏ sùm”.

Dơ̆ jàu dờp sră nggal kwang bàng lòt B mờ ràng tơlik “Ntàu guh tiah ù Bazan” geh bơyai lơh di tàm tŭ tơngai dà lơgar wèt tus tơngkah 50 nam ngai tơrgùm dùl, neh pơgồp bơnah lơh gơ rề uă ală pang kah yau khin cha jak chài tàm rài kis pa. Broă do bè dùl jơnau nting tơngkah rơnàng cau kơnòm să tŭ do kis dipal mờ tơngai lài do, geh kơnòl pơgồp bơnah bơt bơtaù tơnơ̆ do dà lơgar.