Hìu ơm bơh ồng Nguyễn Đình Phong ơm dòp kềng gah dà dờng Gianh. Cờn 1 tàm hìu do dê lời ai jơh hìu bơnhă in ơm. Lòt tus jơh ntùng lòt guh cờn 2, gơlik geh tềng đăp mat là dùl “Hìu ơn prap phan kwơ yau tơrgùm dềt”. Ù tiah do, jơh hìu bơnhă lời is ai ồng Phong in ràng tơlik, ơn prăp ală sră nggal, rùp hin bè Wa Hồ, Đại tướng ƀồc ồng Võ Nguyên Giáp, ală cau kwang ling, cau ling khin cha jak chài, cau ling chơ̆t màng, Mè Việt Nam khin cha jak chài pơn rơ ngan bơh jơi bơtiàn Việt Nam dê.

Neh rlau 50 nam lòt gan, phan jòi tơrgùm bơh ồng Phong dê neh geh rlau 3 rơbô nơm rùp hin, sră nggal kwơ ngan bè Wa Hồ dê bơh tơl rài, bơh pa deh, tào dờng mờ broă lòt jòi gùng dong klàs Dà lơgar, broă lơh kăc màng bơh Wa Hồ dê. Ồng Nguyễn Đình Phong đơs, uă jơnau cih, sră nggal kwơ bè kah yau bơh ƀòn lơgar mờ jơi bơtiàn kung geh ồng jòi tơrgùm, ơn prăp niam ngan:“Nam 1969, Dà lơgar gam tam lơh, tŭ hơ̆ Wa Hồ neh roh rao. Tus nam 1975 Dà lơgar tơrgùm dùl den Wa ờ gam tai, Wa jơh rài kis tài lơgar tài làng bol. Añ neh jòi tơrgùm ală rùp hin do nàng tơl nă cau in gĭt bal, pal geh bơta kờñ gơboh gơwèt mờ Wa den añ hơ̆ sồng jòi tơrgùm, hơ̆ sồng lơh geh bơta do mờ broă do ờ ƀuơn dồ ềt lơi ờ. Tŭ jòi tơrgùm geh uă den añ kơlôi tus lơh broă ơn prap lời wơl ală rùp hin do, den hơ̆ sồng ràng tơlik nàng tơl nă cau in sền bal mờ ngan là ai ràng tơlik ntrờn làm bă tiah tàm ală hìu bơsram nàng ală sau kơnòm bơsram in sền”.

Broă lơh jòi tơrgùm sră nggal bè Wa Hồ bơh ồng Phong dê kung gơtìp uă ngan bòl glar kal ke. Ồng rơlô ờ jai lơh broă tai, tŭ neh kra kung ờ geh priă nhai sơl, lơh sa hìu bơnhă kal ke lơh ồng gơtìp kal ke tàm broă blơi sră, rùp hin, ép plastic nàng ơn prăp. Geh tŭ ồng gŏ geh pang sră niam ngan, geh ală rùp hin kwơ ngan bè Wa Hồ mờ ồng kờñ ngan jòi tơrgùm mơya cau tờm cih bơh pang sră hơ̆ dê tŭ ồng dan den ờ gŏ ai, blơi kung ờ gŏ tăc sơl. Tŭ ồng dan ngan cau hơ̆ ai cồp wơl rùp kwơ do, mờ uă broă lơh ồng lơh ngan jòi tơrgùm tus tŭ geh tơn. Geh tŭ, tài bơh ồng kờñ dùl nơm rùp niam, ờ hoan geh ngan bè Wa Hồ mờ ồng blơi jơh tơn pang sră mìng nàng ai dùl nơm rùp lơm. Broă jòi tơrgùm neh kal ke, broă ơn prap sră nggal sơlơ kal ke rlau tŭ hìu ơm ồng Phong dê ơm rềp kềng gah dà dờng Gianh, nam lơi dà kŏ dà cò kung lìu dà mut tàm hìu. Pah dơ̆ tus kàl mìu dờng dà kŏ dà cò, ồng Phong lài ngan là ntrờn phan bơna kwơ màng ngan rlau jơh bơh rài kis ồng dê là ală phan jòi tơrgùm sră nggal bè Wa Hồ tus tiah ơm lơngăp lơngai, rañ rơsơh.

Ồng Nguyễn Hồng Sâm, 90 sơnam, ơm tàm thôn Tân An, sàh Quảng Thanh, kơnhoàl Quảng Trạch là cau gơ̆p bơyô rềp bal tàm ƀòn sùm dong kờl ồng Phong tàm broă jòi tơrgùm sră nggal kwơ bè Wa Hồ dê. Ồng Sâm pà gĭt ồng Phong kờñ ngan jòi tơrgùm den tàng pah dơ̆ gŏ rùp hin, sră nggal kwơ bè Wa Hồ, ồng Sâm ndrờm yal ai ồng Phong in gĭt nàng jòi broă bơtơl ală phan jòi tơrgùm ồng dê. Jat ồng Nguyễn Hồng Sâm, ală phan jòi tơrgùm sră nggal bè Wa Hồ neh pơgồp bơnah dong cau sền in gĭt wă tai bè bồ tơngoh, nùs nhơm, rài kis mờ broă lơh Hồ Chí Minh dê:“Dilah đơs bè phan jòi tơrgùm mờ ràng tơlik den ết ngan cau lơi lơh gơtùi, mờ mìng geh ồng Phong neh lơh geh bơta do dùl bă nền nòn ngan. Bulah ồng Phong ờ geh priă nhai halà priă lơh geh tài bơh ờ geh bơta pràn nàng lơh broă mơya ồng kờñ ngan, pah nhai geh tŭ añ geh priă nhai rê rlô lơh broă den dong kờl ồng Phong dồ ết nàng dong kờl blơi sră nggal, rùp hin rê nàng jòi tơrgùm. Ồng Phong neh cèng phan jòi tơrgùm ồng dê lòt ràng tơlik tàm hìu bơsram nàng lơh gơrề uă, dong tơl nă cau in gĭt wă bè rài kis broă lơh mờ broă lơh bơh Wa Hồ dê, bơto bơtê ai rơnàng kơnòm să in tàm đòm jat mờ gĭt wă ngan”.

Nhai 5 do là dơ̆ tơngkah kir sơnrai 135 nam ngai deh Củ tịc Hồ Chí Minh dê. Hìu ơm dềt kềng gah dà dờng Gianh bơh ồng Phong dê den hô hơng wơl tai cau tus sền, sền gĭt ală rùp hin niam bè Wa Hồ mờ ală sră nggal kah yau mờ ồng Phong neh lời uă ngan dà kơl hề jòi tơrgùm.

Bi Trần Thị Vân, đoàn viên sàh Đoàn Quảng Thanh, kơnhoàl Quảng Trạch đơs là, ờ duh pal lòt tàm tiah lơi ngài, ală gơ̆p bơyô dilah kờñ jòi gĭt sră nggal kah yau, cau jak chài ngan bơh ală rài mờ jòi gĭt sră nggal bè Wa Hồ dê den mìng tus sền “hìu ơn prăp phan kwơ yau” tơrgùm dềt bơh ồng Nguyễn Đình Phong dê:“Tŭ gŏ ală sră nggal do bơh wa Phong dê, añ gŏ geh bơta ki ngàm gơwèt mờ kwang đơng lam bồ kờñ gơboh ngan bơh jơi bơtiàn dê, pơgồp bơnah ơn prăp mờ lơh gơ rề uă ală sră nggal bè Wa Hồ. Ală phan jòi tơrgùm do kung dong rơnàng kơnòm să in jòi gĭt bè rài kis, broă lơh bơh Wa Hồ dê. Gĭt nđờ rơbô nơm rùp hin bè Wa Hồ geh wa Phong rơndăp tăp sèng niam jak ngan, tàm bơrlŭ ală jơnau yal mờ jơnau tam pà bal, yal ai tơl nă cau sền in tàm ală dơ̆ lơh chờ dờng, nàng rơnàng kơnòm să in gĭt, bơsram, lơh jat krơh niam nùs nhơm bơh Wa Hồ dê.