Mờ tơngume “Par tềng hơđang brê bơnơm dờng ơning ơnàng”, Ngai chờ Khiñ khí kầu Dăk Lăk nam 2025 geh bơyai lơh bơh ngai 1/5 tus ngai 3/05 tàm sàh Krông Na, kơnhoàl Buôn Đôn. Ngai chờ geh 10 nơm khiñ khí kầu par drơng năc lòt nhơl tàm Buôn Đôn mờ 2 nơm khiñ khí kầu ràng tơlik tàm Ƀlàng dờng 10/03, ƀòn dờng Buôn Ma Thuột.

 Giă vĕ lòt sền tàm Buôn Đôn tàm khiñ khí kầu là bơh 140 rơbô đồng tus 800 rơbô đông. Pah dơ̆ par pơgăp bơh 5 tus 10 phuk, tàm bơta jơnhoa 50 thơk. Bal mờ hơ̆, năc lòt nhơl geh sền gĭt ală broă lơh tìp mat lơh kwèng niam chài, đơs crih tam ya ờs mờng, sa ală phan sa tàm tiah ràng tơlik phan sa mờ phan sa bơkah pơn rơ ƀòn lơgar dê.

Ồng Phạm Trung Nghĩa, Củ tịc Anih duh broă Làng bol kơnhoàl Buôn Đôn, pà gĭt, broă lơh geh uă bơnah par ngăc ngar nàng năc lòt nhơl in sac rơ wah sền gĭt. Broă lơh do mpồl lơh broă geh mờng chài rơ̆ ru tàm gah par khiñ khí kầu dê drơng nàng kờñ gàr niam ală bơta bè bơta chài, lơngăp lơngai mờ sền gàr lơngăp lơngai gơwèt mờ năc lòt nhơl. Ồng Phạm Trung Nghĩa, đơs:“Do là dơ̆ sơn rờp dùl broă lơh dờng mờ ală bơta broă lơh sền gĭt is ồn mờ khiñ khí kầu geh bơyai lơh tàm tiah do dê. Broă lơh ờ mìng cèng bơta lơh rài bồ tơngoh đơs crih tam ya lơm mờ gam là rơbàng tàm tơrbŏ nàng mblàng yal niam chài, bơta ƀuơn bơta pràn lòt nhơl, is ồn là bơhiàn niam chài ală jơi bơtiàn Tây Nguyên dê gơwèt mờ gơ̆p bơyô ală tiah dê. Bol he pin dờn là, mờ bơta lơh jat bơh làng bol mờ năc lòt nhơl dê, Ngai chờ khiñ khí kầu kơnhoàl Buôn Đôn rơ̆p gơ gơs dùl tềl lời wơl pal kah ngan, pơgồp bơnah ai Buôn Đôn in gơ gơs tiah tus gơ kờñ ngan tàm sră wăc sềr rùp lòt nhơl Việt Nam dê”.

Bơdìh hơ̆, năc lòt nhơl tus mờ Dăk Lăk tàm dơ̆ ơm rlô Dà lơgar 30/04 mờ ngai 1/05 nam do gam geh sa ală phan sa mờ sền gĭt ală broă lơh niam chài, tàp pràn să jan gơ kờñ ngan geh bơyai lơh tàm ƀòn lơgar, bè ràng tơlik niam chài cing mồng, đơs crih tam ya gùng drà, ràng tơlik rùp hin, phan sa ală jơi bơtiàn dê... Ồng Trần Hồng Tiến, Lam bồ Sờh Niam chài, Tàp pràn să jan mờ Lòt nhơl càr Dăk Lăk pà gĭt:“Ală broă lơh hơ̆ geh bơyai lơh tàm 4 ngai nàng năc lòt nhơl in tus mờ sền gĭt. Bơdìh mờ tus sền klo ngai, gơtùi lòt tàm Buôn Đôn, Lăk halà bàr pe tiah tus sền lòt nhơl, sền gĭt khiñ khí kầu den trồ mang halà ală ngai gam wơl gơtùi sền phan lời wơl niam chài kơphê, đơs crih tam ya Tây Nguyên mờ tus sền ală tiah tềl lời wơl, ù tiah hàng niam tàm ƀòn lơgar dê. Ală phan bơna do den bol añ neh pơgồp bal mờ ală mpồl lơh sa kă bro nàng lam lơh”.