Tơnơ̆ tơmut bal càr, tàm ală gơl gùng tàm tơrbŏ bal bơh tiah đah mat tơngai lik mờ tiah đah mat tơngai mut càr Dăk Lăk dê mpồl phan bơna sơnđờm tàm ntrờn loh làng. Phan lơh geh bơh broă lơh sa suơn sre bơh tiah đah mat tơngai mut jat rơndeh mù tàm dà lềng, phan dà lềng bơh tiah đah mat tơngai lik lòt sơlơ̆u wơl guh tus tiah brê bơnơm; dùl tŭ bal, khà năc lòt nhơl bơh tiah đah mat tơngai mut mù tus tiah jat kềng gah dà lềng kung gơguh pràn, lơh geh ală gùng lòt “lòt dà lềng- rê brê bơnơm” sùm. Bal mờ ală dơ̆ pơndiang phan là dơ̆ tìp mat, cribơyai, kĭ hơ lơh broă bal đah mpồl lơh sa kă bro 2 đah dê.

Mò Nguyễn Thị Nga, Củ tịc mpồl cau ùr lơh sa kă bro Phú Yên pà gĭt, tơnơ̆ tơmŭt bal, mpồl kă bro phan đah mat tơngai lik - đah mat tơngai mut neh gơguh rlau mờ nggùl pơndrờm mờ lài do- dùl khà sồ pà gŏ “dà lềng” mờ “brê” gam ngan ngồn tàm kŭp tê bal tàm dùl ù tiah lơh sa tơrgùm bal:“Bol añ bal mờ gơ̆p geh bơta bơnĕ bơnài bal gĭt wă loh bal, jòi gĭt tai drà kă bro, đah mat tơngai lik jòi gĭt bè broă lơh sa suơn sre ai tiah đah mat tơngai mut den jòi gĭt bè phan tàm dà. Tŭ do añ gŏ gơ lơh bè ală bơyô tàm tiah đah mat tơngai mut tàm càr Dăk Lăk neh mờ gam mù tàm tiah đah mat tơngai lik blơi phan tàm dà mờ lòt nhơl uă ngan”.

Bal mờ rơ hời tơnguh tàm pơdar jun pơndiang phan bơna đah mat tơngai lik- đah mat tơngai mut, lòt nhơl kung geh bơta tam gơl nàng kờñ ngui jơh ală bơta ƀuơn bơta pràn “dùl càr- 2 mpồl broă”. Nam 2026, càr Dăk Lăk sền gĭt mat kă bro “Sền gĭt tiah phan lời wơl”, ngui bơta kwơ niam chài phan bơna mờ ờ di phan bơna, wèt tus jơnau kờñ wă rlau 8 tơlak dơ̆ năc, priă lơh geh 16 rơbô tơmàn đong. Bơta gơ hòi gơ jà bơh càr Dăk Lăk dê rơ̆p geh lơh gơrề pràn kơl dang bơh 41 tăp lơma “Dăk Lăk lòt là kờñ ngan”, pờ tơlik tàm ală gah mblàng yal jơnau, đơs nền gơnoar broă bơh dùl tiah tus tơrgùm bal bơhiàn niam chài is phan sa, cau mờ ù tiah brê bơnơm dờng ơning ơnàng.

Ồng Trần Hồng Tiến, Kwang lam bồ Sờh Niam chài Tàp pran să jan mờ Lòt nhơl càr Dăk Lăk pà gĭt, càr rơ̆p bơyai lơh ală broă lòt nhơl jat 4 kàl, pơgồp bal mờ dơ̆ lơh chờ, sa tềp mờ ală dơ̆ ơm rlô jŏ ngai, lơh geh mpồl phan bơna geh sùm gùt nam. Bal mờ hơ̆ là lơh pràn yal tơngĭt uă rùp hin, li la phan bơna sền gĭt mờ lòt nhơl mang, tàm tơrbŏ gùng lòt bơh tiah kơh bơnơm mù tus tiah kềng gah dà lềng:“Tŭ do, càr Dăk Lăk kung neh kĭ lơh bal mờ ală càr bè Khánh Hoà, Lâm Đồng, Gia Lai, Hà Nội, ƀòn dờng Hồ Chí Minh, Đà Nẵng. Gơwèt mờ càr Khánh Hoà den bol añ tơrgùm gơ hòi gơ jà năc ală lơgar bơh Khánh Hoà tus Dăk lăk ngan là tơnơ̆ tŭ gơl gùng lòt mhar lơh sir den bol añ rơ̆p tơrgùm yal tơngĭt uă rùp hin càr Dăk Lăk dê nàng lơh bè lơi geh ală phan bơna pa nàng hòi jà năc ală lơgar tus mờ Khánh Hoà rê mờ Dăk Lăk”.

Nàng ală gah lơh sa càr Dăk Lăk pa tơnguh mhar ƀuơn ngan, phan bơna bơt bơtàu gùng lòt rê càr dê geh broă lơh tam gơl kwơ màng. Gùng rơndeh lòt mhar Khánh Hoà- Buôn Ma Thuột neh ai lòt rê măi mok, gùng dờng 14 pleh đah mat tơngai lik Buôn Ma Thuột neh ai rơndeh lòt rê, gùng rơndeh lòt mhar Quy Nhơn - Chí Thạnh kung mờr tus ngai sơnđờm ai lòt rê.

Jat ồng Trần Đình Long, lài do là Phó Cau kong kơnòl Anih duh broă Adat boh lam bơh Quôk hội dê pà gĭt, tŭ ù tiah bơtàu tơnguh geh pờ ơnàng mờ phan bơna bơt bơtàu ală tiah geh lơh sir, broă ai rơndeh jun pơndiang phan bơna, tam pà lơh broă mờ bơtàu tơnguh kă bro phan- drơng broă rơ̆p lơh geh ală tŭ tơngai niam dờng ngan, ngan là tàm tiah neh bơtàu tơnguh lơyài lài do dê:“Đah Tuy Hòa mờ Buôn Ma Thuột geh bơta ngài tàm gùl mờ tàm gùl hơ̆ tŭ do lơyài ngan bơtàu tơnguh, mờ tàm tiah hơ̆ là tiah geh bơta ƀuơn bơta pràn dờng ngan. Tŭ do là 1 càr den ngan ngồn gơ ờ gŏ di là tiah sar lơgar ngài tai. Tŭ lơh geh ală gùng lòt rê tàm ală tiah, broă lòt rê jun pơndiang phan bơna, tam pà lơh broă, bơtàu tơnguh kă bro phan - drơng broă rơ̆p pờ geh tŭ tơngai niam dờng ngan. Do là bơta pràn mờ tŭ do bol he pa sơnđờm mut lơh”.

Mut tàm tơngai lơh broă bơh nam 2025-2030, Dăk Lăk sền gĭt bơtàu tơnguh tam gơl pràn jat tàm phan bơna bơt bơtàu kwơ màng, tam gơl niam sră nggal gơnoar atbồ mờ tiah bơcri priă niam. Củ tịc Anih duh broă Làng bol càr Dăk Lăk, ồng Tạ Anh Tuấn pà gĭt, mờ tờm ngan là tàm tơrbŏ ù tiah bơh brê tus dà lềng, càr rơ̆p bơt bơtàu ală bơta kwơ lòt nhơl- phan lơh geh bơh broă lơh sa suơn sre - phan brê - phan tàm dà dờng pràn.

Ồng Tạ Anh Tuấn pà git: “Tàm tơrbŏ tiah kơh bơnơm mờ tiah jat kềng gah dà lềng mờ ală gùng pleh do rơ̆p là gùng tờm nàng bơtàu tơnguh broă lơh sa mờ măi mok, broă lơh sa suơn sre ngui măi mok pa mờ lòt nhơl drơng broă logistics. Dơ̆ 2 là rơ̆p bơt bơtàu mờ bơtàu tơnguh ală bơta kwơ tàm tơrbŏ bal phan lơh geh bơh broă lơh sa suơn sre- phan brê- phan tàm dà jat gùng lòt tiah đah mat tơngai mut kơh bơnơm rơ̆p là tiah phan lơh geh tơrgùm nàng lơh broă sa suơn sre ngui măi mok pa, năng lượng lơh gơlik wơl mờ lơh gơlik phan bơna broă lơh sa suơn sre, tiah đah mat tơngai lik rơ̆p là anih tờm lơh gơlik phan jrô, drơng broă logistics mờ ngui niam bơta ƀuơn bơta pràn bơh lơh sa dà lềng dê”.

Nam pa cèng bal bơta pin dờn bè dùl Dăk Lăk tam gơl pràn ngan, tiah brê tơlir tìp dà lềng tơlir niam, tiah ală gùng lòt pờ gùng ai bơta kơ̆p kờñ brồ ngài in, nàng ù tiah kơh bơnơm- jat kềng gah dà lềng cơnđờm bal mut tàm gùng lòt bơtàu tơnguh pràn kơl dang, kơnhăp kơ̆ mờ bềng bơta kơ̆p kơnờm.