Nkhêp nkah ndray 135 năm Nar deh Kruanh Hồ Chí Minh, ăp n’gor tâm nkual Tây Nguyên ƀư âk nău kan mbah rhơn. Ôi 19/5, Tỉnh ủy Kon Tum ƀư Tâm nchră n’glôch jêh 10 năm tĭng ƀư nău ntrŭnh mbrô 05 bah Bộ Chính trị khóa XII “mpeh ntrôl dăng kơt nti, ƀư tĭng nău mĭn, nuih n’hâm uĕh lŏng, trong gŭ rêh Hồ Chí Minh”. Rlău 10 năm an ƀư, n’gor hŏ ƀư jêng ngăn ngăn nkô̆ way kan grêt dăch ngăn ngăn, nău dơn kan tĭng rơh. Ăp gưl, n’gâng kan hŏ rdâk njêng 2.760 trong ntĭt leo uĕh, trong ƀư nsĭt geh nău dơi tam, rêng lam jru hvi nău kơt nti n’hanh ƀư tĭng nău Wa tâm dăp rgum nău kan Đảng n’hanh nsum mpôl ƀon lan gŭ. Ta tâm nchră, Tỉnh ủy Kon Tum mpư rnê, ndơ̆ siƀŭt nkhôm rnê bah Bí thư Tỉnh ủy n’hanh bằng khen bah Kruanh  UBND n’gor an 30 mpôl, 46 nuĭh geh nău dơi ntoh lư. Aơ lah rnôk gay lam n’gor năl di tay nău khlay kan, nkô̆ hôr ngăn ngăn bah nău kơt nti n’hanh ƀư tĭng nău Wa tâm rơh rdâk njêng Đảng n’hanh hun hao n’gor.

Kŏ tâm ôi 19/5, Rnâng kan Đoàn n’gor Lâm Đồng ƀư rƀŭn lôch 10 năm ƀư tĭng nau rđau rmô 05 bah Bộ chính trị gưl 12, nkre rnê druh ndăm blau ƀư tĭng nau Wa Hồ năm 2025. Ăp năm ma aơ, lam n’gor Lâm Đồng hŏ ƀư săk tam âk nau kan druh ndăm ăp gưl, đah rnoh dĭng lĕ rlau 76 rmen prăk, tâm nê geh 45 ntŭk kan gưl n’gor, 446 ntŭk kan gưl nkuăl ndrel rlau 8.400 ntŭk kan, nau kan tâm dâng. Lâm Đồng hôm mât 160 nau kan nsum, rmôt mât ntŭk ntu, rgum rlau 4000 đoàn viên, druh ndăm râng. Tâm 10 năm Đoàn n’gor rnê 380 ntŭk, nŭih geh nau blau ndrel rnglăp rlau 5.800 đoàn viên gĭt blau lăp Đảng Cộng sản Việt Nam.

Ôi 19/5, UBND n’gor Đắk Nông ƀư rơh rgŏ jă “Tết tăm si mbro mbrăng nkah gĭt Wa Hồ” n’hanh an ƀư trong nchrăp tăm bri năm 2025. Ta rơh lễ, kruanh rđău kan kuăl jă lĕ rngôch nhih pah kan, đơn vị, nkuâl n’hanh nuĭh ƀon  lan nsrôih tĭng nău ntĭm nti bah Wa: “Yor ma nău geh jât năm tăm si, yor ma nău geh rhiăng năm tăm nuĭh”. Lôch rơh lễ rgŏ jă, ăp đại biểu hŏ tăm 1.300 tơm n’ho pe lha ta nkual dăp rgum nđĭr uĕh mpeh trong nchrăp ƀư ntŭk ntô ndơ dŏng Đắk Nút, nkual ƀon têh Gia Nghĩa. Ndrel rnôk, ăp nkuâl ta lam n’gor du rơh ƀư lễ rgŏ jă n’hanh luh hăn tăm si đŏng. Năm aơ, n’gor Dak Nông n’gluh rnoh tât hun hao rlău 1.700 hécta bri.