N’gul khay 7, jay mhe bah wa Nguyễn Thị Nhường, ta phường Ea Kao lĕ ngăch jêh, di tâm rơh nkah gĭt 79 năm nar Thương binh liệt sĩ. Geh tâm săk khih dak si dioxin bah nuĭh mbơ̆ tă râng tâm lơh tâm su, nău rêh wa Nhường mô tŏng, knŭng mpŏng ŭch geh du mlâm jay nâp nâl. “Dơi Đảng, Ngih dak ndrel ăp ngih pah kan nău kan nsum mpôl ntop kơl ƀư jay mhe, rnăk wâl rhơn ngăn. Mpŏng ŭch âk năm aơ jêng ngăn. Aơ lah nuih n’hâm gay rnăk wâl nsrôih, rêh uĕh n’hanh geh nkô̆ nău lơn”.

Nău răm nĕ lơ tŏng ăp rnôk ăp nuĭh na nê̆ rgop soan rdâk ƀư jay an wa lŏ lah ăp nuĭh tahen Wa Hồ. Ăp năm bah năp, 10 cán bộ, tahen Tiểu đoàn Đặc Công 20, Lữ đoàn Đặc công 198, Binh chủng Đặc công bơi kơt geh măt ƀa ƀơ ta ntŭk kan. Bah nău rdêng lŭ choih, kuih neh tât ntop kơl ndâk ƀư, rmôt đặc công lĕ kơl rnăk wâl wa Nhường rhoăt ngăch n’hanh n’hŭch âk prăk. Thiếu tá Nguyễn Văn Duẩn, Chính trị viên groi Tiểu đoàn Đặc công 20 nkoch: “Jêh rnôk dơn nău kan, mpôl hên lĕ mât uănh lĕ rngôch oh nô mĭn lah kloh nsrôih jêh di trong nchrăp, kơl yơ kônh geh jay nâp nâl, kloh ueh. Jêh rnôk lôch, ntŭk kan răk rwach kloh ueh lĕ rngôch nkual gay rnăk wâl trơn lăp gŭ du trong ueh lăng ngăn”.

Lah đah wa Nhường lah nău du năm đah du chor jay mhe, ri đah rnăk wâl wa Phạm Thị Ngân ta phường Tân An, knŭng ŭch du jrô mô hôm truh ăp rnôk mih lĕ lah nău uĕh lăng têh. Sai wa tă râng tâm lơh, 2 kon bu klô geh khuch dak si dioxin. Du hê lĕ roh, nuĭh kon ƀa ƀă lĕ rlău 40 năm yơn mô dơi hăn nsong, ăp nău gŭ âm knơm tâm nuĭh mê̆ bơ̆ ranh.

Jrô ntŭk nuĭh kon rêh âk năm bah năp geh truh sat, chor thạch cao djơh, mpir lăp dak mbrĭng. Jêh bơi du khay, đah nău lăp bah rmôt dân quân, rnă njrăng bah dâng. Hôị Nông dân n’hanh Đoanf druh ndăm, jay lĕ dơi nkra lĕ rngôch bah hôm lăp dak, ƀư chor, sơn mpir tât nkra jâng gung. Wa Phạm Thị Ngân rhơn nkoch: “Dơi tăngt đah tahen nkra jay gŭ kơl ri dŭt ndrăt, yor rnăk wâl geh trong đă kon manh nuĭh, yơn klăi hăn ƀư kan ngai mô dơi sĭt, lap ngăn dơi ngih dak kơl, dŭt rhơn”.

Tĭng wa Nguyễn Công Thảo, Groi Kruanh UBND phường Tân An, ntŭk aƀaơ geh bơi 480 nuĭh geh soan. Rơh 27/7 năm aơ, ndrel đah ăp nău ƀư “Rsơl plơng”, phường lĕ kơp uănh n’hanh dăn đă ntop kơl jay gŭ an ăp nuĭh tŏng ăp. Êng đah rnăk wa Ngân, ƀon lan rgŏ jă tay ăp nuĭh lŏng bôk tôr ntop kơl ƀa ƀơ. “UBND phường lĕ geh hăn uănh lĕ rngôch mbơh n’hanh dơi n’gor, Trung ương uănh an nkra an 2 hê, du hê 30 rkeh prăk nkra tay jay gay đăp mpăn gŭ âm an 2 rnăk, nău rêh bah khân pơng đăp mpăn lơn, ueh lơn. Rlău ma nĕ, Đảng ủy, Ủy ban phường hăn khâl ăp nuĭh dơi kơl, rlău ma prăk bah Trung ương đah n’gor ri phường tâm pă tơm prăk an ndơ du rnăk 200 rbăn”.

Lam n’gor Dak Lak aƀaơ geh 42 rnăk lah kon deh bah nuĭh hăn tâm lơh tâm si geh khih dak si hóa học dơi ntop kơl jay gŭ, geh 22 rnăk ƀư mhe n’hanh 20 rnăk nkra. Gay jêh bah năp lơ 27/7, ăp ntŭk kan tahen lĕ hăn pah kan bah dŭt khay 5.

Tĭng wa Đào Mỹ, Groi Kruanh UBND n’gor Dak Lak, nău jêh bôk nău kan bah năp lơ 27/7 mô knŭng đăp mpăn ngăch n’gluh an ma hôm ndơ an nkah gĭt ngăn ngên an ăp rnăk kon deh bah nuĭh hăn tâm lơh tâm su geh ntưp dak si hóa học. “Mpôl hên nsrôih jêh nău rdâk ƀư ăp jay aơ n’hanh aơ lah gay ntrŭt nsôr, bônh bah oi nău roh rngot bah nuĭh bên bah khân pơng n’hanh dơi nuih n’hâm Đảng n’hanh Ngih dak uănh tât mât uănh an ăp nuĭh geh soan đah neh dak”.

Du mlâm jay jêh bah năp lơ 27/7 mô knŭng kơl ăp rnăk  geh ntŭk gŭ nâp hvi lơn, ma hôm lah an saơ nău nkah gĭt dơi ƀư đah ăp nău kan na nê̆. Rnôk ăp chor jay dơi rdâk, ăp nău roh rngot yor tâm lơh tâm su du gâl dơi jŭt jăng gay ăp rnăk geh nău rngot tâm lơh tâm su geh tay nău nsing nơm n’hanh ntrŭt nsôr hao tay tâm nău rêh./.