Ta rơh tâm mâp, Kruanh n’gâng kan Lê Hoài Trung lah na nê̆ Việt Nam uănh Hoa Kỳ lah ngoăy tâm âk dak kan ndrel dŭt khlăy bôk năp, ŭch ndrel đah Hoa Kỳ ndơ̆ tay nău tâm boh kan 2 dak hăn lăp jru , săk rnglăy, ngăn ngên n’hanh lĕ rngôch, tâm di đah nău geh ueh nsum bâh ƀon lan bar dak, tâm rgop âk an nău đăp mpăn, tâm kơl n’hanh hun hao ta nkual n’hanh ta lam ntur neh. Ta rơh tâm mâp, bar ding lĕ tâm ban ŭch tâm kơl tay gay ma ndâk nsơm nău tât khuch bâh rơh tâm lơh tâm su, njrăng rdâng đah dak si khih đioxin, uănh tay bom mìn, kơl an nuĭh quet nte, joi tahen Hoa Kỳ roh  mô hŏ saơ nting khĭt ta ta rơh tâm lơh, tâm ban kơt joi, rgum n’hanh uănh năl ntơ săk  tahen khĭt tâm lơh bâh Việt Nam. Kruanh n’gâng kan Lê Hoài Trung nkoch mbơh mpeh ăp nău jêr tâm nău ntrôl ngăch ƀư tĭng joi, rgum n’hanh uănh năl nău ntơ săk tahen khĭt bâh Việt Nam, nkre lah rnê âk, nău tâm rgop khlăy mpeh săm ƀŭt kan, nău mbơh n’hanh rnoh ndơ geh ƀư, công nghệ uănh năl ADN bâh mpeh Hoa Kỳ n’hanh đă mpeh Hoa Kỳ an geh mât tay nău kan, pơk hvi nău tâm kơl kan n’hanh ntêm an rnoh kan tâm di đah trong kan aơ.