UBND n’gor Đăk Lăk mhe tâm rgop đah cục cảnh sát Mât uănh hành chính mpeh nău đăp mpăn rêh jêng n’gâng kan công an, công an n’gor n’hanh Công ty GeneViet  ƀư bôk nău kan rgum donh ntil ADN bâh rnăk vâl tahen khĭt tâm lơh kăl e ma mô hŏ năl ntơ săk. Aơ mô dơn lah nău kan lah ueh di rơh 27/7 ma hôm nha lah ntrong kan gay ma mbơh na nê̆ “ Nău kan 500 nar măng ntrôl joi, rgum n’hanh uănh năl nău ntơ tahen khĭt tâm lơh” dôl geh mbơh ƀư kan ta lam dak.

Tĭng nău mbơh kơp, lam n’gor Đăk Lăk aƀaơ geh 15.222 môch tahen khĭt tâm lơh kăl e. Tâm nĕ, ăp ntŭk kan têh lĕ geh uănh năl, rgum donh nău mbơh bâh 10.235 tahen khit, mhe geh 5.911 nuĭh geh năl ntơ săk, hôm 4.324 tahen ê hŏ geh năl ntơ săk. Nău dŭt nkah ngăn lah geh 2.706 tahen hôm nha tŏng ăp nuĭh ta rnăk vâl gay ma sŏk ADN, đah lĕ rnoh 3.865 nuĭh. Rơh uănh năl aơ geh nău ŭch dơn rlău 70% rnoh ntil gay ma tŏng nău kan rdâk njêng du ntŭk rnoh mbrô ADN ngih dak, kơl an nău tâm rđil, uănh năl nău  ntơ săk tahen khĭt tâm let năp tay.

Gay ma nău dơn ntil geh ƀư tâm ban, tâm di nău way n’hanh mât đăp mpăn tâm di ngăn, Công an n’gor Đăk Lăk lĕ pă 12 ntŭk sŏk năl ta lam n’gor, rgum lĕ mpôl kan bâh gưl n’gor tât gưl xã gay ma ntĭm leo, kơl an ƀon lan ƀư lôch sƀ rhŏ kan, uănh năl nău mbơh n’hanh sŏk ntil ndơ  gay ma năl. Đại tá Võ Hùng Tường, kruanh ntŭk kan cảnh sát Mât uănh hành chính mpeh mât đăp mpăn nău rêh jêng. Công an n’gor Đăk Lăk an gĭt. "Mpôl hên tâm rgop na nê̆ đah ăp nău kan bâh ntŭk kan mât uănh hành chính, pă mpôl pah kan ta 12 ntŭk sŏk ntil năl n’hanh tâm ndrĭh ƀư sŏk năl bâh 23 tât 26/7/2026. ăp ntŭk kan lĕ geh mpôl kan kơl an sŏk rgum ntil ndơ năl tâm ban kơt năl an tâm di nău mbơh bâh ƀon lan gay ma mât đăp mpăn nău sŏk năl ntil an tâm di lơn”.

Tât râng ta ntŭk sŏk ntil năl ta phường Ea Kao, wa H Blak Niê geh nkre nău knơm bâh lĕ rnăk vâl. I kônh wa lah tahen khĭt tâm lơh kăl e yơn âk năm mô geh gĭt ntŭk tâm lơh, ntŭk khĭt mô lah môch tâp. Đah rnăk vâl wa nău sŏk ntil ADN mô dơn lah du nău kan hành chính ma lah rơh gay ma joi tay ndul mham lĕ tâm nhhơt ta rơh tâm lơh tâm su. "Đảng n’hanh Ngih dak lĕ geh sŏk ntil ADN gay ma joi rnăk vâl nuĭh tahen khĭt tâm lơh kăl e, rnăk vâl rhơn ngăn, mpoh ang nău knơm gay ma hên dơi geh joi saơ kônh hên nơm”.

Nău khlăy ngăn bâh bôk nău kan rơh aơ lah mô dơn ta công nghệ ueh mhe ma hôm nha ta nău khlăy mpeh nău tâm pêt tâm rŏng. Ăp ntil ADN geh mât rbăy nar aơ mbra dơi ê hŏ geh nău geh dâl, yơn mbra jêng du nău kan khlăy ngăn tâm ntŭk kan rnoh mbrô ngih dak, mbra geh dơi tâm rđil đah ăp nău mbơh mhe mpeh nău dŏng nting tahen khĭt tâm lơh kăl e geh rgum. Nĕ lah trong kan lah ueh mô dơn ta ăp nău way kah gĭt dơm ma hôm nha geh ƀư đah ăp nău kan na nê̆. Yor lôch rlău n’gul rach năm đăp mpăn, nău ma âk rnăk vâl kâp knơm hôm nha lah du nar nuĭh ta rnăk vâl nơm geh ntơ di săk, geh plơ̆ sĭt đah ƀon tơm. N’hanh ăp ntil ADN geh donh rgum lah du nău knơm gay ma ăp nău tâm mâp tâm rgum lôch rơh tam lơh tâm su ơm geh jêng nău dơi.