Ta ntŭk nchrăp ƀư Nhih nti Phổ thông Dân tộc nội trú rep gưl Tiểu học - THCS Sa Loong, xã Sa Loong, hang rhiăng công nhân dơi tâm pă âk bôk chruh, du rơh an ƀư ăp ndơ ntrŭp tâm trôm. Ta ăp rot nhih nti, công nhân lôch jêh ntưm chor; ta nâm, ăp mpôl sơn ndăn ngăch ƀư lôch jêh ăp mpir n’glĕ dŭt. Tâm ăp jrô nti, mpông, điện mpoh ang, rbong ndring jay, ntung gung n’hanh ăp ndơ ntrŭp dŏng dôl dơi ntrŭp ăp kôp.

Nuĭh tơm ƀư dja dôl an ƀư 5 rot jay gŭ nti, 1 rot jay mât bôk kan, 1 rot jay rgâl uĕh tay ndrel ăp ndơ ntop dŏng. Tĭng trong nchrăp, 5 rot jay gŭ nti mbra dơi ndơ̆ jao bah năp nar 30/7; rot jay mât bôk kan ƀư lôch jêh bah năp nar 10/8; jay dŏng âk ntil ndơ n’hanh ăp ndơ ntrŭp hôm ƀa ƀă nchrăp ƀư lôch jêh bah năp nar 15 tât 20/8.

Mih ntoch jong âk nar khuch tât rnoh ngăch ƀư. Gay nkra bah, nuĭh ndranh ntưm baih nking tay ta nkual, nkre ntop n’hao tay nuĭh kan ntop kơl. Aƀaơ mât ta rnoh nklăp 220 nuĭh kan, pah kan nklăp 11 mông ăp nar. Wa Nguyễn Văn Nhất, Groi Giám đốc Chi nhánh 29.7, mpeh Tổng Công ty 319, Bộ Quốc phòng, lah rjăp, ntŭk kan ntrŏng aơ lah nău kan chính trị khlay jêng hŏ rgum lĕ tơm nuĭh kan, ndơ dŏng kan gay đăp mpăn rnoh ngăch:

"10 nar rlău aơ, mih dŭt âk. Ntŭk kan hŏ ntơm an ƀư ăp trong nkra bah, kơt ntưm baih lĕ rngôch ăp nkual ntă lĭr bah dih. Đah nkual lăk jâng gung, ntŭk kan hŏ n’hanh dôl ntưm bar nkưp baih, ăp jay nklăp 60 mét, gay ƀư tâm trôm rnôk bri mih. Nchrăp tât nar 15/8 mbra ƀư lôch jêh lĕ rngôch rot jay nti n’hanh rot jay ký túc xá".

Ta ntŭk ƀư Nhih nti Phổ thông Dân tộc nội trú rep gưl Tiểu học - THCS Dục Nông, nuĭh ndranh dôl rgum ntơm bah 250 tât 270 công nhân ƀư mbro tâm 3 tơ̆ tâm du nar. Tĭng trong nchrăp, bah năp nar 31/7 mbra jao an 7 rot jay lah 3 rot jay gŭ nti THCS, 3 rot jay nti Tiểu học n’hanh jay mât bôk kan; ăp jay gŭ, jay sa mbra ƀư lôch jêh bah năp nar 15/8.

Thượng tá Vũ Thanh Khương, Bí thư Đảng ủy, Kruanh Hội đồng Quản trị Công ty Cổ phần 319 Miền Trung (mpeh Tổng công ty 319, Bộ Quốc phòng) an gĭt, ntô bah lơ hŏ ƀư lôch jêh. Aƀaơ ăp rmôt ƀư rgum tâm gâl ƀư lôch jêh kơt sơn, ntă, ntrŭp mpông, ndơ ntrŭp dŏng, rbong ndring jay, loih, lăk lŭ ntung gung n’hanh ăp ndơ kỹ thuật. Thượng tá Vũ Thanh Khương ton lĕ ma rnoh ngăch n’hanh nâp uĕh nhih nti.

"Nsrôih ndơ̆ jao lĕ rngôch nhih nti an nuĭh tơm ƀư n’glăp dŏng bah năp năm nti mhe. Aƀaơ, ta nhih nti, nuĭh ndranh way rgum ntơm bah 250 tât 270 công nhân ƀư 3 tơ̆ pleh, tâm pleh mbro. Êng pleh măng, ăp tơ̆ ntơm bah 50 tât 80 nuĭh kan pah gay nsrôih ƀư nhih nti lôch ngăch di rnoh ndơ̆ luh".

Tĭng Ban mât uănh trong nchrăp ntuh kơl mpeh nhâp nar Quảng Ngãi, 4 ntŭk nhih nti ta n’har bri Rờ Kơi, Sa Loong, Dục Nông n’hanh Mô Rai dôl tĭng groi nđôi rnoh ngăch ƀư ăp nar. Ban Mât uănh tâm pă cán bộ kỹ thuật way gŭ kâp ta ntŭk ƀư nhih nti gay năn ngăch droh rklaih jêr jŏt, lơn lah tâm rnôk trôk nar tât ndal.

Tât aƀaơ, nhih nti Rờ Kơi geh tât nklăp 90% rnoh âk nău kan, Dục Nông geh tât 87%, Sa Loong geh tât 82%, hôm Mô Rai geh nklăp 68%, lĕ rngôch dôl lăp tâm rơh ƀư lôch jêh. Wa Võ Đại Tân, Giám đốc Ban Mât uănh trong nchrăp ntuh kơl mpeh luh nar n’gor Quảng Ngãi an gĭt, nău ŭch lah ndơ̆ lĕ 4 nhih nti lăp dŏng ăp kôp bah năp nar khai giảng năm nti 2026 – 2027, rgop tĭng ƀư geh nău dơi Nghị quyết mbrô 71 bah Bộ Chính trị mpeh đăt ndal hun hao ntĭm n’hanh nti, tĭng kơn ntruch huêt tâm ƀah mpeh nău geh kơt nti đah nkual dŭt jêr jŏt mha êng đah ăp nkual êng ƀa ƀă.

"Aơ lah ngih nti mô dơn nsrôih ƀư lôch jêh ma hôm ân ƀư lôch jêh gay tŏng geh ntŭk ntĭm n’hanh nti bah ăp mon său. Yor kơt nê̆, mpet jâk mpeh mông nar lah dŭt têh, lơn lah tâm rnôk trôk nar tât djơt. Ban Mât uănh dôl nsrôih tât nar 31/7 mbra ƀư lôch jêh ăp ndơ ntrŭp tâm trôm, ntưm tôn. Lôch nê ntrôl ngăch ƀư tay ăp ntŭk nhih nti lôch jêh bah năp nar 15/8. Lĕ rngôch ăp ntŭk nhih nti ân dơi nchrăp ăp tŏng, đăp mpăn rhŏ dŏng an năm nti mhe tĭng rđău đă bah Trung ương".