Lah ta rnôk ntơm pơk Tâm nchră Trung ương 3 khóa XIV, Tổng Bí thư, Kruanh dak Tô Lâm lah rjăp ân rgâl bah dăp rgum nuĭh kan jêng n’hao nău dơi rđău đă, mât bôk kan n’hanh săk blău mât dŏng bah Đảng n’hanh lam trong kan chính trị.

Tĭng Tổng Bí thư, Kruanh dak – glêh tam nuĭh kan lah ndơ nsing, nău ŭch n’glĕ dŭt lah Đảng rđău đă geh nău tam lơn, Ngih dak mât bôk kan jăp lơn, nuĭh kan nchuăt dŏng ngăch lơn n’hanh ƀon lan dơi rhŏ dŏng uĕh lơn dơm. Nkô̆ dja hŏ dơn geh nău uănh khlay n’hanh tâm ban ŭch âk bah rơh kơn ƀon lan n’hanh ăp nuĭh rnâng kan, nuĭh khoa học. Thứ trưởng Bộ Nội vụ ơm Nguyễn Tiến Dĩnh năl lah, kơt Tổng Bí thư, Kruanh dak Tô Lâm lah rjăp, nău dăp rgum nuĭh kan tâm bah ri aơ nơh lah du rơh cách mạng gay glêh tam lam trong kan chính trị, nkra bah kưn, chong cheng, hŭch đêt ăp mbah kơn ndranh klang n’gul. Yơn lah, glêh tam nuĭh kan lah ndơ nsing; nău ŭch tât n’glĕ dŭt lah rdâk njêng du bôk nău kan kloh rvah nâp dăng, kan yach ngăch, geh nău tam, n’hao săk blău mât bôk kan gưl neh dak n’hanh rhŏ dŏng ƀon lan nar lơn ma jăp uĕh lơn. Bah nê gay tŏng di nuih n’hâm bah ƀon lan, sŏk ƀon lan ƀư rgum tơm tâm ăp nău kan, tâm ban kơt trong nchrăp trong kơl bah Đảng, bah Ngih dak.

Tĭng wa Nguyễn Tiến Dĩnh, dăp rgum nuĭh kan nkre đah an ƀư n’gâng kan 2 gưl lôch an ƀư, hŏ njêng nău rgâl uĕh ngăn, nuĭh kan nchuăt dŏng glêh tam lơn rđĭl đah ntơm nơh. Bôk năp bol hôm geh âk jêr jŏt, wăk kol- yơn lah tât aƀaơ lôch du năm tĭng ƀư, nuĭh kan tâm lam trong kan chính trị ta ăp gưl bôk năp hŏ lăp đăp mpăn, kan geh rĭng grep lơn, đăp mpăn n’gâng kan dăch ƀon lan, grêt dêh ƀon lan lơn. Pah kan mât uănh ngih dak, nta joi nău kan an nuĭh ƀon lan n’hanh doanh nghiệp nar lơn ma ngăch, nsĭt geh nău tam lơn; rnă njrăng chính trị, rep grep lam rêh jêng kon nuĭh dơi mât nâp, wăng sa- rêh jêng kon nuĭh dơi hun hao tay. Lôch uănh năl wăng sa rêh jêng kon nuĭh bah lam dak hao âk da dê rđĭl đah ndrel khay dja năm e nơh- Aơ lah ăp nău dơi bôk năp an saơ trong nchrăp dăp rgum, glêh tam nuĭh kan lah di trong rƀŏng.

Gay n’hao nău dơi rđău kan, mât uănh n’hanh săk tam rhŏ dŏng ƀon lan, wa Nguyễn Tiến Dĩnh an lah, ân rgum ƀư lôch jêh trong tĭng rdâk njêng nuĭh kan, nkre n’hao săk blău rmôt cán bộ, công chức, lơn lah rmôt cán bộ kruanh rđău kan, cán bộ kruanh rđău kan têh jong. Bah meng nău way blău kan, cán bộ ân geh nuih n’hâm uĕh lŏng kan, nuih n’hâm dơn kan n’hanh nău gĭt êng rhŏ dŏng ƀon lan uĕh lơn. Wa Nguyễn Tiến Dĩnh rgop nău:

“Gay ntơm bah n’gâng kan bar gưl n’hanh kan uĕh lơn, tâm let năp tay he mbra ra uănh tay n’hanh tâm pă gưl, lơn lah tâm pă nău dơi kan du trong dăng lơn n’hanh tâm di lơn, kloh rvah lơn. Ra uănh tay gay he geh ndơ ma dăp rgum tay nuĭh kan, lơn lah ăp nuĭh kan nhih pah kan way blău kan gay tŏng an nău ŭch geh n’hanh lơn lah n’hao săk blău kan bah rmôt cán bộ công chức tâm nhih pah kan aƀaơ.