Ta ntŭk ƀư nkual gŭ mhe 5 ha ta xă Hồng Sơn, n’gor Lâm Đồng âk rbăn nuĭh pah kan ndrel đah âk ntŭk dôl ƀư ăp trong ndeh tâm n’gor. Wa Đặng Hữu Linh, Kruanh ntĭm rđău ntŭk kan an gĭt, ntŭk kan ndâk ƀư ndăn ngăch, tât aƀaơ jêh bơi 50% rnoh ndơ ƀư. “Ta ntŭk ƀư mât na nao rlău 35 nuĭh kan, n’ăp ƀĭt măy. Aƀaơ oh nô dôl rgum ntrôl ngăch gay đăp mpăn trong nchrăp n’gluh an jêh ndơ ƀư tâm khay 9/2026”.

Ta ntŭk ƀư nkual ntŭk gŭ mhe ta xă Lương Sơn, n’gor Lâm Đồng, ăp phung pah kan ndrel âk ndeh dôl ƀư neh trong. Nkual ntŭk gŭ mhe ta xă Lương Sơn dơi ndâk ƀư ta rnoh rlău 4 ha, jêh rnôk lôch mbra tâm di rlău 100 rnăk. Ntŭk aơ hôm nklang ntŭk tăch rgâl. Wa Phạm Huy Hoàng, Kruanh ntĭm rđău ntŭk kan, an gĭt, đah ngăch prăl aƀaơ hin, ntŭk kan nchrăp jêh ndâk ƀư tâm n’gul khay 8 tât.“Ăp nar ta ntŭk kan pă 8 nuĭh ndâk ƀư, du ntŭk bah 10-12 phung pah kan. Trong kan đăp mpăn pah kan, đăp mpăn răk ntŭk ntô gŭ rêh ƀư tĭng di tĭng samƀŭt njuăl bah n’gor ndơ̆ an. Ntĭt nsa, rse điện mbra pă an đăp mpăn, mô an lêng lang. Ăp ntŭp rluh, rlâm ri ndrăng rse mbơh, mbơh an đăp mpăn ntŭk kan gay đăp mpăn hăn trong an kônh wa n’han oh nô ndâk ƀư”.

Gay rhŏ an nău nchrăp ƀư trong ndeh treng hăn ngăch, n’gor Lâm Đồng lĕ sŏk neh đah rnoh neh rlău 1.000 ha. N’gor rhoăt ngăch mbơh ƀư ndâk njêng 8 nkual ntŭk gŭ mhe an bơi 1.000 rnăk ƀon geh khuch yor nău nchrăp ƀư. Wa Đặng Tuấn Anh, Ban mât uănh nău nchrăp ƀư ntuh kơl ndâk nkra mrô 2 n’gor Lâm Đồng, an gĭt, aƀaơ lĕ rngôch neh lĕ dơi jao an gay ăp ntŭk kan ndâk ƀư 8 nău nchrăp ƀư. Nkre ăp nău wăl kol tâm rnôk ndâl ƀư lĕ dơi dôh rklaih gay ntrôl ngăch:“Ăp ntu neh ta n’gor Bình Thuận ơm, lơn lah nkual mpeh bah dâng geh âk ntu lĕ nar an jêng mô dơi pă tay. Nuĭh tơm lĕ tâm rgop đah N’gâng kan tuch tăm ntŭk ntô gŭ âm n’hanh ăp ntŭk kan geh tât gay joi trong dôh rklaih jêr jŏt. Aƀaơ hin, ăp nkô̆ nău wăk kol bah lơ lĕ mkra jêh, ăp nuĭh ndranh dôl ndrôl ngăch gay ntop tay lvang bah năp mbrơi.