Ntơm njêng bâh năm 2021 đah 7 nuĭh kan ndrel, tât aƀaơ, HTX  nkra ƀư, tăch rgâl- dịch vụ Mắc ca Ea H’leo lĕ geh rlău 30 nuĭh kan ndrel, mât uănh klâp ma 140ha cà phê n’hanh mắc ca. Năm 2025, ntil ndơ măc ca bâh HTX geh ƀư tăch an dak  Hàn Quốc tĭng trong tơm, nkre lah geh nău ntơ ntil ndơ công nghiệp nkual ƀon lan ntoh lư gưl ngih dak, lôch geh nău nkhôm rnê Mai An Tiêm năm 2024.

Tĭng nău mbơh bâh wa Nguyễn Trọng Huê, Giám đốc HTX, nău dơi mô dơn tât bâh nău pơk hvi nkual tăm mô lah n’hao nău ueh kah ntil ndơ ma hôm nha bâh nău mĭn rgâl mhe nău mât uănh, ƀư kloh ueh tâm nău leo kan n’hanh n’hao nău kan bâh ăp nuĭh kan.  “Nău kan HTX lah nău kan hun hao dŭt jêr, yơn lah geh dŏng kan tâm di mbra geh hun hao ngăch n’hanh nâp nâl. Gay ma dơi geh pah kan ueh lơn an geh nău tâm rgop na nê̆ n’hanh kloh rjăp mpeh nău mbơh tơih pah kan tơm prăk, pă nău dơi pah kan, pă nău kan an ăp nuĭh rĭ HTX mbra geh ueh lơn”

Ndrel đah nău rgâl mhe mât uănh nău kan, âk HTX ta Đăk Lăk dôl geh an saơ nău săk rnglăy bâh nău kan tâm rgop pah kan jan sa, Ta HTX Nông nghiệp- nău kan dịch cụ Công bằng Ea Tu- phường Tân Lập, 49 nuĭh kan ndrel, tâm nĕ geh 90% lah nuĭh rnoi đê̆, dôl geh mât uănh rlău 250 ha cà phê. Bâh geh pah kan tĭng nău mpŏng kan, cà phê bâh HTX way geh tăch đah rnoh khlăy lơn bâh 2 tât 2,5 rkeh prăk.tấn/ kơl an ăp rnăk kan ndrel hao bah 10 tât 25 rkeh prăk ăp năm. Tâm nkoch mpeh nău tă blău pah kan, wa Nguyễn Đình Trọng, Giám đốc HTX an gĭt.  “Hợp tác xã an geh rgŏ jă êng, mô geh kâp knơm tay, năp lor he an geh ƀư ueh, nău knơm tâm nău pah kan jan sa rĭ bâh nĕ geh ăp nuĭh khân păng mbra joi tât nơm, nĕ lah nău khlăy ngăn he an geh ƀư lor hôm ngih dak kơl lah du gưl dơm gay ma kơl dơh an geh hăn kan ngăch lơn mô geh kâp knơm ta nău kơl an lĕ rngôch bâh Ngih dak”.

Ta xã Ea Nuôl, n’gor Đăk Lăk, HTX Nông nghiệp n’hanh dịch vụ pâl nđaih Phú Nông Buôn Đôn lĕ geh săch trong kan bâh hun hao nău dơi bâh ta ntŭk rnôk tâm rgop tuch tăm đah pâl nđaih rlong gĭt uănh kan. Njêng bâh năm 2019 tât aƀaơ HTX lĕ geh 46 nuĭh kan ndrel tâm rgop prăk kan, rgop soan hun hao nău pah kan tuch tăm- pâl nđaih văr dak bât pă điện Serepok 3. Wa Trần văn Toàn, Giám đốc HTX an gĭt, nău dơi geh ƀư jêng mô dơn lah rnoh prăk ma lah nău tâm rnglăp n’hanh ndrel tâm mbơh pă nău kan đah ăp nuĭh kan ndrel, uănh năl di nkô̆ nău kan n’hanh hun hao nău dơi ơm geh bâh ta ntŭk nơm gŭ.  “Mpôl hên leo kan tâm rgop prăk kan tâm rgop ăp ntŭk kan gay ma ntuh kơl ăp nău kan ma HTX lĕ geh săch lor, sŏk 2 ntil nău kan tơm ƀư tơm khlăy hun hao lah nău pah kan tuch tăm tâm rgop đah pâl nđaih rlong kan ta văr dak bât pă điện Serepok 3. Bâh njêng njêng ta nkual nĕ hôm nha âk mir tơm, âk nkual neh nklơi dơm tât aƀaơ lĕ njêng du ntŭk gŭ rêh dŭt ueh, dŭt âk ntil ndơ dŏng, geh âk năch pâl nđaih tât”.

Đắk Lắk aƀaơ geh 1.220 HTX đah rlău 185 rbăn nuĭh kan ndrel. Ta ntŭk geh âk nău dơi gay ma njêng ăp HTX đah rnoh kan dŭt têh tâm trong kan tuch tăm, tăm bri, tui ka, pâl nđaih ta ntŭk rêh jêng, công nghiệp nkra njêng n’hanh logistic. Yơn lah, ta Đăk lăk mhe geh klâp ma 20% HTX tât râng ăp nău kan tâm rgop, tâm rnôk nĕ geh klâp ma 80% hôm nha pah kan êng, joi êng ntŭk tăch an ndơ geh ƀư. Aơ lah nău jêr ngăn ƀư an nău wăng sa kan nsum ê hŏ dơi hun hao n’hao lĕ nău dơi kan nơm.

Nghị quyết Đại hội Đảng bộ n’gor Đăk Lăk năm kan 2025-2030 uănh năl, nău wăng sa kan nsum lah ngoăy tâm âk nău nsrôih khlăy ngăn gay ma ƀư tĭng nău ŭch hun hao GRDP bâh 11%/năm let lơn tâm âk năm tât tay. Wa Lương Nguyễn Minh Triết, Uỷ viên Trung ương Đảng, Bí thư n’gor Uỷ Đăk Lăk nkoch nău min, nău tâm rgop kan ndrel ta HTX an geh rgum n’hao nău dơi kan ueh nău pah kan, hun hao tĭng trong tâm rgop kan ndrel mhe, ndrel đah nău kan khoa học công nghệ, rgâl mhe mĭn kan, rgâl mhe rnoh mbrô, nău wăng sa tâm pleh, tuch tăm sinh thái n’hanh tâm rgop rnoh pah kan ndrel.  “Tâm rgop pah kan ndrel n’gor an geh rgum n’hao nău săk rnglăy pah kan bâh ăp ntŭk kan ndrel, nkre lah leo kan uănh năl rnoh âk, nkre lah uănh nău dơi geh leo kan ueh, rgum rdâk njêng ăp nău kan tâm kơl kan ndrel tĭng trong mhe, ngăn lah tâm nău uănh khlăy rgâl mhe trong kan mât uănh, mât uănh gĭt na nê̆ tu tơm, tăch rgâl điện tử n’hanh tâm rgop ntŭk tăch rgâl, ndrel đah nău kan dŏng khoa học công nghệ, rgâl mhe rnoh mbrô, nău wăng sa ueh nđir, nău wăng sa tâm pleh, tuch tăm ntŭk sinh thái, tuch tăm mô dŏng phân dak si n’hanh tâm rgop đah ndơ khlăy bâh ndơ geh ƀư”.

Bâh ăp nău kan ta ntŭk kan ndrel geh săk rnglăy ta Đăk Lăk mbra dơi geh saơ, ntŭk kan ndrel aƀaơ mô hôm lah nău pah kan geh nău mĭn kơt ntơm. Rnôk geh saơ nău mât uănh ueh mhe geh ƀư jêng nău kan tơm, tâm rgop rnoh khlăy  ƀư nău kan tơm n’hanh nău dơi geh nuĭh kan ndrel ƀư tơm, ăp ntŭk kan ndrel lơ ma jêng ntung njŏ ndơ̆ ndơ tuch tăm ta Đăk Lăk hun hao ta ntŭk tăch rgâl, tâm rgop ăp nar lơ ma ueh lơn ta nău hun hao wăng sa ta ntŭk.