Ăp nar aơ, ntŭk nkra ƀon gŭ mhe Kiên Long, Xã Bình An, n’gor Gia Lai dôl ma geh âk máy móc, ndơ dŏng. Aơ lah ntŭk gŭ têh ngăn tâm 9 ntŭk ƀư nau kan nkra trong hăn ngăch Quy Nhơn-Pleiku, hvi nkăp 10 ha.

            Gay năn jao tâm khay 7, ntơm bah khay 3 năm aơ, ăp tơm ƀư kan hŏ rgum âk jêt bôk máy, ƀư nau nkra tâm măng nar.  Wa Nguyễn Trung Cần, ntoh măt tơm ndâk nkra ntŭk kan mbơh, tât rnôk aơ, rnoh ndâk nau kan geh nklăp 80%, ƀư jêh ăp nau kan kơl an ân jêh lor gay jao 119 tâm rnoh 250 ntŭk neh tâm nkuăl:

            ‘Rnôk ndơn geh neh tŏng nau dơi gay ma ndâk nkra, rmôt kan hŏ rgum geh rlau 30 bôk ndeh têh gay ma leo nchuăn rdeng, 10 máy kuih, 6 máy uih neh, 6 máy rlă đăp neh ndrel ma rhiăng nŭih kan ƀa ƀơ ndâk nkra, kơp n’ăp ma măng nar, gay ƀư jêh đăp mpăn nau ngăch”.

            Tâm 9 ntŭk njok trong nkra, ntŭk ntu geh ntuh kơl nkra ueh nâp, đah trong hăn, điện mpoh ang, pă dak, cáp nkoch mbơh nau ndrel ma rklaih dak ndŏk hoch tâm nâm neh, pơk nau ueh ân nâp nâl, ueh nâp.

            Ndơn nau mbơh ntŭk geh ndơn neh ƀư, wa Trần Văn Thông, tâm thôn Kiên Long, xã Bình An, rhơn yor ntŭk gŭ mhe geh nau rêh ueh nơih lơn:

            ‘Rnoh neh ân ntrơn ntŭk gŭ mhe ăp ntŭk kŏ đê̆ yơn đŏng, yơn lah nau ueh mhe âk ntil mra ƀư geh âk lơn đŏng. Ta aơ êp ma trong Quốc lộ 19B, trong hăn ri kŏ nơih ueh lơn. Nau kan ntuh kơl nkra dak kloh kŏ kơt lah ntŭk ntu êp tâm ntŭk gŭ mhe geh âk nau ueh ang lơn”.

            Nau kan ntrŭnh ƀư nau pă neh, pă ntŭk gŭ ndrel ma ntŭk ntu gung trong dŏng kan ân tâm ban lĕ geh pơk nau nơih ueh tâm nau ŭch bah ƀon lan. Ngăn lah, tâm rnôk dôl kâp rnơm nau nthoi pă dak kloh rgum, UBND n’gor Gia Lai hôm kơl an prăk kuih ntu ân 150 rnăk tâm ntŭk ƀon gŭ mhe, kơl an kônh wa đăp mpăn ntrơn tât gŭ ntŭk mhe. Wa Thái Văn Điểm, Groi Kruanh Jrâu kan Văng sa xã Bình An, Gia Lai, mbơh:

            ‘Rnâng kan mât bôk nau kan bah xã jă rnăk ƀon lan tât Uỷ ban xã Bình An ntrŭnh ƀư nau kan gay pă neh gŭ. Âk ngăn kônh wa rhơn yor Ngih dak ntuh kơl, kơl an ntŭk ntu nau kan ueh mhe tâm ban”.

            Ntrong hăn ngăch Quy Nhơn-Pleiku jong nklăp 125 km, rnoh ntuh kơl rlau 43.700 rmen. Gay kơl an nau ntrơn ntŭk, n’gor Gia Lai ndâk 9 ntŭk gŭ mhe rgum ndrel 2 ntŭk ntŭk tâm srah, pă ân rlau 500 rnăk geh sŏk lơi neh nkra trong.

            Tât rnôk aơ, lĕ 9 ntŭk gŭ mhe kŏ dôl tâm rnôk ƀư ân jêh.  Wa Phạm Sĩ Duy Nhân, Rnâng kan mât ăp ntŭk trong hăn ndrel dŏng nau kan bah n’gor Gia Lai mbơh, âk ntŭk kơt Trà Sơn, Thuận Đức, Trường Định 2 ndrel Kiên Long hŏ ƀư jêh ăp nau kơl an, jao neh gay n’gor pă ntŭk gŭ:

            ‘Mpeh rnâng kan mât, phung hên nchrăp đă nŭih ƀư mro nau mât ân tâm dăch ma ntŭk gŭ, tâm rgop nsum ndrel mbơh uănh nâp bah ăp tơm ntuh kơl n’hao nau ngăch nau ê nkra, ƀư ân ueh 3 ca 4 kip mro, nkra n’ăp ma măng nar gay ntrŭt dăng nau ngăch nau kan. Tât rnôk aơ, nkuăl ƀư nau kơl an pă dăp rgum ƀon lan gŭ ri hŏ bơi jêh ndrel jao ân ăp xã ƀư pă lô, pă neh gŭ ân ƀon lan. Ăp nkuăl hôm e, Rnâng kan kŏ dôl nsôih gay ma ntrŭt dăng ngăch gay ƀư jêh nau kan tâm khay 7”.

            Nau kan ntrŭt dăng ngăch ƀư jêh ăp nkuăl neh gŭ âm njok ma trong hăn ngăch Quy Nhơn-Pleiku tâm Gia Lai mô knŭng kơl an ƀon lan ơm ndâk tay nau rêh, ma pơk trong nơih gay ƀư ăp bôk nau ntrŭnh nau kan tâm di nau ngăch. Aơ lah nau nsôih khlay gay ntrŭt dăng nthoi nkuăl, pơk hvi ntŭk kan ndrel pơk tay nau nsôih hun hao văng sa, rêh jêng ân n’gor.