Tâm 6 khay bôk năm, HĐND ăp gưl kan n’gor Đăk Lăk lĕ geh mbơh tơih âk nău kan khlăy tâm rnôk ta rơh mhe rgâl ndơ̆ nău kan, mhe lôch pă dăp nău leo kan tĭng trong kan ta ntŭk 2 gưl. HĐND ăp gưl lĕ geh leo ƀư nău kan tĭng trong n’gâng kan ta ntŭk 2 gưl. HĐND  gưl n’gor lĕ geh ƀư 4 rơh rƀŭn nchră, ntrŭnh mbơh 46 Nghị quyết, pah kan ôp mbơh nău geh rgâl mhe tay, rgum ta ăp nău kan ma ƀon lan geh mât uănh âk. nău kan tâm mâp ƀon lan geh mât kan ƀa ƀơ, dơn geh rlău 788 nău tâm rgop, nău dăn đă gay ma ndơ̆ an ntŭk kan geh nău dơi kan uănh n’hêl, doh rklaih.

Ta gưl xã, HĐND ăp ntŭk lĕ geh ƀư rlău 400 rơh rƀŭn nchră, mbơh tơih rlău 2 rbăn nghị quyết, ƀư tĭng geh bơi tât 230 rơh uănh nđôi bôk nău kan n’hanh 58 rơh uănh nđôi, ntop doh rklaih ăp nău jêr jŏt ta ntŭk kan ba dâng.

Mpeh ăp nău kŏ văk, âk nău tâm rgop an lah mpôl kan ndơn kan đại biêủ way kan ta gưl xã hôm nha đê̆, nău dơi uănh ôp, mbơh nău n’hanh uănh năl ê hŏ tâm ban, nău kan rgâl mhe rnoh mbrô n’hanh geh dŏng nău kan rƀŭn nchră mô geh sƀ hôm nha mbrơi. Ăp đại biểu lĕ dăn đă an n’hao nti nău kan way kan, ƀư lôch nău tâm rgop đah HĐNĐ đah UBND n’hanh ăp ntŭk kan way kan, nkre lah ntrôl dăng dŏng công nghệ thông tin gay ma n’hao an săk rnglăy nău pah kan bâh ntŭk kan ƀon lan săch.

Ntoh ngơi ta rơh rƀŭn nchră, wa Cao Thị Hoà An, Uỷ viên Trung ương Đảng, Groi Bí thư rnâng kan n’gor Uỷ, Kruanh HĐND n’gor Đăk Lăk đă HĐND ăp gưl an geh ƀư tĭng tay nău ngăn ta ntŭk, djăt nău tâm rgop, nău ŭch rŏng bâh ƀon lan gay ma ngăch mbơh tơih, dăn đă đah gưl kan geh nău dơi. Nkre lah, n’hao nău uănh nđôi gay ma ƀư tĭng ăp nău nghị quyết, ăp bôk nău kan, ntrong kan tơm. Wa Cao Thị Hoà An lah na nê̆. “Nău dơn kan bâh Hội đồng nhân dân an geh lăp kan, an geh gĭt vât, an geh gĭt mơh ntŭk gay ma tât râng mbơh tơih an Đảng. Yơn đah nău kơl kan an Uỷ ban bâh nău kơl kan, mbơh tơih ăp nău uănh nđôi, uănh năl gay ma doh rklaih nău kŏ văk. Geh cán bộ der kan đŏng lah mô, geh cán bộ mô nănh ƀư mô nănh kan đŏng lah mô? N’hanh nău kan hội đồng nhân dân ăp gưl lah an geh rgâl mhe têh dăng lơn, ndrel lăp kan nsum, ndrel hăn rĭ nău kan mơ geh ƀư lôch ueh.

Hương Lý/ VOV Tây Nguyên