Kêng măng, trong bê tông ta thôn Lầu Nàng, xă Ia Lốp, n’gor Dak Lak n’gŭr răm nteh nuĭh hăn jâng thể dục. Rnôk măng tât, trong ŭnh măng nar ntơm ang. Wa Vi Thị Phương, nuĭh ƀon lan thôn Lầu Nàng rhơn nkoch; nău rgâl aơ geh rlău n’gul khay aơ, bah rnôk geh trong điện yor druh ndăm kơl kan nglăp ta trong me bah thôn. Ndơ ƀư lôch jêh, trong hăn lĕ jêng ntŭk ƀon lan tâm mâp, hăn thể dục. “Rhơn ngăn, lĕ ƀon ăp nuĭh rhơn đŏng, yor geh điện mpoh ang ta trong an ăp yơn hăn dơh lơn, saơ ang lơn n’hanh uĕh lơn. Lĕ ƀon ndrel ty mât an trong nar lơ uĕh”.

Trong điện aơ lah ngoăy tâm âk ndơ ƀư dơi mbơh ƀư tâm Nău kan Druh ndăm kơl kan yan mih năm 2026 yor rmôt sinh viên Ngih samƀŭt Đại học Nam Cần Thơ tâm rgop đah đoàn viên druh ndăm ta ntŭk ƀư ta 2 xă Ia Lốp n’hanh Ea Rốk, n’gor Dak Lak. Ăp nău ƀư kơt nkra jay an rnăk geh khuch yorr sial rwănh blông, rdâk ƀư ntŭk nti an kon hŏk ach o, ndâk ƀư tach pâl play mô lah ƀư bôk naư kan rgâl nja ka su sŏk ndơ, rƀŏng tĭng tâm ăp naư ŭch na nê̆ bah nuĭh ƀon lan nkual n’har bri, rgâl nău wât mpeh mât njrăng ntŭk ntô gŭ âm, mât uănh săk soan.

Nô Ngân Văn Thành, Groi Kruanh Ủy ban MTTQ Việt Nam xă, Bí thư Đoàn xă Ia Lốp, an gĭt, ăp ndơ ƀư dơi nuĭh ƀon lan ndrel râng mât, dŏng đăp mpăn, kơl nău khlay bah nău kơl kan geh jŏ jong. “Ăp băl đoàn viên, druh ndăm dŭt n’hâm kơl kônh wa ƀon lan ƀư ăp ndơ ƀư, nău kan ngăn ngên, nsĭt tay nău uĕh an kônh wa ƀon lan ta ntŭk. Ăp ndơ ƀư kơt Mpoh ang trong ƀon tơm dơi kônh wa djôt dơn n’hanh uănh lah prêh, hôm ndơ ƀư tach pâl play ri nsĭt tay nuih n’hâm thể dục thể thao an đoàn viên, druh ndăm n’hanh kônh wa”.

Đah ăp băl mom, bôk nău ƀư kơl kan hôm djôt tât ăp nău ƀư ngăn geh nkô̆ ta nkual nar bri Dak Lak. Đah âk sinh viên, aơ lah rơh bôk năp tât jâng nkual n’har bri, na nê̆ mâp cán bộ tahen dôl ƀư kan n’hanh uănh saơ nău rêh hôm e âk jêr jŏt bah nuĭh ƀon lan. Sinh viên Nguyễn Phú Quý, ngih samƀŭt đại học Nam Cần Thơ nkoch: “Rnôk oh pah kan nĕ ri oh saơ dŭt răm rhơn. Đah oh lah du hê mom ri oh geh n’hâm soan, geh nuih n’hâm n’hanh mĭn ƀư mhe ri oh mbra ndrel ty đah ăp băl sinh viên gay kơl ăp nuĭh”.

Ăp ndơ ƀư knŭng lah du gưl nău jêt, yơn rnôk geh bah nău ŭch bah nuĭh ƀon lan n’hanh dơi ƀư đah nuih n’hâm lĕ đah nău kan bah druh ndăm, ăp nău rgop nĕ dôl jêng rgâl mhe an ăp ƀon lan nkual n’har bri Dak Lak