Dak Lak aƀaơ geh rlău 41.000 ha sầu riêng, tâm nê nklăp 30.000 ha dôl an klêh play, rnoh âk năm 2026 nchroh bơi 500.000 tấn. Yơn lah, lam n’gor Dak Lak mhe geh 280 mã mbrô nkual tăm đah nklăp 7.500 ha n’hanh 42 mã mbrô ntŭk nklâm tâl dơi mpeh Trung Quốc uănh an dŏng. Aƀaơ hôm 165 mã mbrô nkual tăm n’hanh 66 mã ntŭk nklâm tâl hŏ ƀư lôch jêh siƀŭt yơn dôl nha hôm kâp mpeh Trung Quốc mĭn uănh đŏng.

Ta rơh pah kan đah kruanh rđău kan Bộ Nông nghiệp n’hanh Môi trường, wa Nguyễn Thiên Văn, Groi kruanh UBND n’gor Dak Lak dăn đă.

"Dăn đă Bộ Nông nghiệp n’hanh Môi trường ndrel ăp nhih pah kan geh tât, lơn lah Bộ Ngoại giao, kan nsum pah kan đah mpeh Trung Quốc gay ơm uănh an ăp siƀŭt dăn mã mbrô nkual tăm hŏ ƀư lôch jêh, bah nê pơk hvi neh tăm tŏng nău dơi tăch n’gluh. Nkre nta trong dơh gay geh tay doanh nghiệp râng ntuh kơl ntŭk nklâm tâl ta ntŭk."

Ndrel đah Dak Lak, ăp n’gor Gia Lai, Lâm Đồng, Quảng Ngãi nkoch âk jêr jŏt rnôk an ƀư Nghị định 38 mpeh mã mbrô nkual tăm n’hanh ntŭk nklâm tâl đŏng. Ăp n’gor dăn đă ơm geh trong ntĭm nti dŭt ơm mpeh trong tâm n’guăk nơm gư tăch n’gluh, nkre lôch jêh ăp tŏng trong mât prăp nău lư lôch rnôk nghị định geh nău tam. Wa Hà Ngọc Chiến, Chi cục trưởng Chi cục Tuch tăm n’hanh Mât njrăng si tăm n’gor Lâm Đồng mpơl nău rgop:

"Lôch rnôk Nghị định 38 geh nău tam, dăn đă ơm geh trong ntĭm nti dơn ngoăy mpeh trong mât uănh gay ăp n’gor geh ntŭk nsing an ƀư. Lah mô hŏ geh trong ntĭm nti na nê̆ ri dŭt jêr tĭng ƀư."

Wa Nguyễn Hoàng Hiệp, Thứ trưởng Bộ Nông nghiệp n’hanh Môi trường an gĭt, Bộ dôl gŭ mĭn rgâl nkra Nghị định 38 tĭng nău rđău đă bah Thủ tướng Chính phủ tĭng trong rƀŏng ngăch ngăr lơn; nkre keh mbrô lĕ rngôch rêng pă an mã mbrô nkual tăm ntŭk nklâm tâl, rgâl âk bah prăk uănh năl lor jêng uănh năl bah kơi gay hŭch bah đêt siƀŭt an nuĭh ƀon lan n’hanh doanh nghiệp.

Đah khay klêh play sầu riêng năm aơ, ăp n’gâng kan Việt Nam dôl pah kan đah mpeh Trung Quốc gay ntrŭt ntrôl rnoh ngăch pă mã mbrô nkual tăm, ntŭk nklâm tâl; nkre ntrŭt nsôr hun hao tăch n’gluh sầu riêng kât nđik, pơk luh ntŭk tăch rgâl n’hanh ntop kơl Dak Lak an ƀư trong kan 30 nar lôch jêh rgum prăp nău lư nkual tăm.

Yơn lah, trong nkra tâm ban gay n’gâng kan sầu riêng hun hao jŏ jong hôm lah rdâk njêng nău nsing nơm bah ntŭk tăch rgâl ma trong mât chăm geh nău dơn kan đŏng. Ăp ndơ geh ƀư âk ƀoi tơm luh, năl kloh nău dơn kan bah tĭng tơm nuĭh tâm rêng mât chăm. Rnôk săk kah dơi đăp mpăn n’hanh kloh rvah, sầu riêng Việt Nam mơ tĭng kơn rdâk njêng dơi săk ntơ lư gưl neh dak, pơk hvi "mbor soih" lăp tâm ntŭk tăch n’gluh n’hanh bah ir nsing tâm du ntŭk tăch.

Wa Nguyễn Hoàng Hiệp lah kloh:

"Ŭch rdâk njêng nău nsing nơm bah ntŭk tăch rgâl ri ăp ntil ndơ geh ƀư ân ƀoi geh tơm luh, gĭt ndơ tă tă bah nuĭh ƀư, mhâm rêng ƀư n’hanh rnôk geh nău tih ri ân năl dơi nău dơn kan. Rnôk lam trong ƀoi tơm luh dơi n’glăp dŏng ăp tŏng, mpôl hên mbra ndrel ăp n’gor mbra tĭng ƀư ăp kôp nău dja."