Trong nchrăp BLOOM dơi geh ntop kơl bah Chính phủ Canada ma Bộ Ăp nkô̆ nău lam ntŭr neh Canada, an ƀư ta bar n’gor Dak Lak n’hanh Tuyên Quang ntơm bah khay 6/2026 tât khay 4/2030. Trong nchrăp mô dŏng tơm prăk ơm geh; nuĭh tơm kơl nơm mât uănh, groi nđôi nău dŏng tơm prăk dja. Trong nchrăp rƀŏng tât sĭt jêng n’hanh n’hao săk geh ndơ gŭ rêh geh rnoh khlay mpeh âk ntil ndơ gŭ rêh, nkre n’hao ngăch bên di đah rgâl duh nđik trôk nar an bu ur rnoi mpôl đê̆ n’hanh nsum mpôl ta ntŭk.

Ta Dak Lak, ntŭk an ƀư rgum ta Bri mât Chư Yang Sin n’hanh ăp xã meng bri lah Hòa Sơn, Cư Pui n’hanh Yang Mao. Lĕ rngôch tơm prăk ntop kơl mô mplơ̆ tay rlău 21 rmen prăk (tâm ban đah 1,1 rkeh Đô la Canada).

Trong nchrăp rgâl geh trong rêh bah nklăp 1.500 nuĭh geh dŏng na nê̆ n’hanh 6.000 nuĭh geh tât ring tam bah ngai. Ma ăp nău kan ntop kơl kỹ thuật, trong nchrăp mbra ntrŭt ntrôl dŏng ăp trong nkra nsing tâm bri dak đah tâm ban bu ur  bu klô, n’hao nău dơi mât, dŏng jŏ jong tơm bri dak mpêt khlay n’hanh n’hao nău khlay kan, nău tam ngơi bah bu ur rnoi mpôl đê̆ tâm pah kan mât, njrăng bri.

Lah ta rơh lễ ntơm pơk, wa Nguyễn Thiên Văn, Groi kruanh UBND n’gor Dak Lak an lah, trong nchrăp BLOOM geh nkô̆ khlay ngăn ngăn tâm rnôk n’gâng kan ta ntŭk dôl nsrôih mât ndray âk ntil ndơ gŭ rêh nkre đah hun hao joi geh trong rêh jŏ jong an nuĭh ƀon lan nkual rnoi mpôl đê̆. Păng dăn đă ăp n’gâng kan bah lơ, bah dâng n’hanh ăp nhih pah kan geh tât kan nsum lhăt đah nuĭh tơm kơl gay an ƀư trong nchrăp kan di, tât rnoh ngăch, đăp mpăn nsĭt geh nău tam.

“UBND n’gor Dak Lak ton mbra way uănh khlay, rđău đă grêt dăch n’hanh nta ăp trong dŭt dơh uĕh gay ăp ding an ƀư trong nchrăp kan dơh soih, gay trong nchrăp kan tât đah nsum mpôl ; nsrôih nkoch trêng gay nuĭh ƀon lan wât, tâm ban ŭch n’hanh lor nchrăp râng tâm ăp trong nkra ƀư nsing tâm bri dak, tâm ban kơt hun hao ăp trong ntĭt leo joi geh trong rêh jŏ jong; hun hao ăp trong ntĭt leo mhe; n’hao nău khlay kan bah bu ur tâm ăp nău kan tuch tăm, mât ndray âk ntil ndơ gŭ rêh”.