Rmôt hăn kan ta Quân khu 5 yor Thiếu thướng Lương Đình Chung, Groi Chính uỷ Quân khu 5 ƀư nau kan tơm hŏ hăn mêt uănh nau kan rgum sŏk uănh gay năl moh săk bah ăp nting tahen khĭt ê gĭt năl moh tâm môch tâp tahen xã Đức Cơ, n’gor Gia Lai. Rmôt hăn kan hŏ tât mêt uănh nau kan hăn sŏk ndơh ndơ uănh năl, ndơh ndơ dŏng kan, nau kan mêt prăp ndrel ndơh ndơ mât uănh săm ƀŭt nchih nkoch. Nkre lah, djăt Rnâng kan rđau kan 515 n’gor Gia Lai ndrel ăp rmôt kan ƀư nau kan aơ nkoch mbơh mpeh ăp nau tă geh dơi ƀư bah nau ntrŭnh kan, ăp nau nơih ndrel nau jêr tâm rnôk ƀư nau kan aơ. Ntŭk tâp tahen khĭt tâm Đức Cơ rnôk aơ lạh ntŭk tâp bah âk rbăn tahen khĭt, tâm nê, hôm âk ngăn môch ê geh năl moh săk mô lah mô gĭt kloh nau mbơh geh.

Nau kan ndơn rgum nting gay ma uănh năl ADN geh ân lah nau kan khlay ngăn gay ma kơl an nau kan uănh năl kloh moh săk bah ăp tahen khĭt mô năl moh. Bah nau kan mêt uănh, Thiếu tướng Lương Đình Chung kơp dơn nuih n’hâm ƀư nau kan prêh bah ăp rmôt râng ƀư nau kan, nchrăp rklaih ăp nau jêr mpeh mih, nar, ntŭk ntu jêr tât gay đăp măpn ngăch ndrel ân geh nau blau kan. wa kŏ đă gưl uỷ, n’gâng kan tâm n’gor, ăp rmôt kan n’gâng kan tahen ndrel rmôt kan n’gâng kan tơm ân geh tâm rgop kơp, tâm rđil nau geh mbơh tă bah âk ntŭk săm ƀŭt, nkre ntrŭt dăng nau nkoch trêng, ndơn nau mbơh tă bah ăp tahen ơm ndrel ƀon lan gay kơl an nau uănh năl kloh moh săk bah ăp nting tahen./.