Rnôk geh cán bộ ndrel tahen biên phòng tât tâm ƀon gay ma bonh đă nau gŭ âm đăp mpăn, ntĭm ƀư lŏ dak, mât rong, nau rêh mhe bah kônh wa rnoi La Hủ tâm ƀon Pha Bu, xã Pa Ủ, n’gor Lai Châu lơn ma geh rgâl. Ndrel tâm nau nê, bu ranh Ly Xạ Pu lah ngoai tâm ăp nŭih leo trong lor. Mô klach rvê ma mih, nar, păng tât ăp rnăk gay ma đă kônh wa jăng lơi nau ơm, mât răk kloh ƀonb, nsôih pah kan jan sa, mât trong n’har bri:“Ân nsôih ân lôch n’hâm gay ma bonh đă ƀon lan gĭt, ăp nau ma nơm dơi ƀư ndrel moh ăp nau ma nơm mô dơi ƀư. Gay đăp mpăn ân nau rêh bah ƀon lan ăp nhoat hun hao, ri ma nơm knŭng blau nsôih n’hâm bonh đă kônh wa ƀon lan pah kan jan sa, pah kan gay tŏng sa, tŏng nsoh. Gâp knŭng blau nsôih nkoch trêng, bonh đă kônh wa ƀư ân nâp jăp lơn tay dơm”.

            Ntơm năm 2020 tât rnôk aơ, bu ranh Ly Xạ Pu hŏ râng ma rhiăng tŏ hăn nkoch trêng tâm ăp ƀon nkuăl prêh n’har bri. Ăp nau mbơh ngơi tâm dăch dơh yơn geh nau nâp bah wa hŏ rgop nau ƀư rgâl nau mĭn, nau kan bah kônh wa La Hủ tâm ƀon nơm.

            Rnôk aơ, tâm ƀon Pha Bu, Nhú Ma, Vạ Pù mô lah Tân Biên...âk rnăk hŏ blau tăm ba dak, rong mpa, tăm tơm dak si, dŏng điện thoại gay ma tăch ndơh ndơ nơm tăm. Kon se geh hăn nti play săm ƀŭt, nti nau ngơi yuăn. Gay ƀon lan rnơm ndrel ƀư tĭng, rnăk wa Pu mro leo trong lor tâm ƀon gay hun hao văng sa ma nau rong ndrôk, rong sur, tăm thảo quả ndrel sa nhân tím. Jêh âk năm gơih pah kan jan sa, 3 ha quế, sa nhân hŏ geh klih, kơl an rnăk nô rklaih ach o:‘Wa Pu lah nŭih gơih ngăn tâm nau kan, mro hăn tât ăp rnăk tâm ƀon gay ma bonh đă, tâm kơl an kônh wa ntơm bah nau kan jê̆ ân tât nau kan jêr.  Wa mro ntĭm nti ân nŭih ƀon lan ăp nau ueh ndrel ƀa ƀơ bonh đă kônh wa ƀư ueh ăp nau kan tâm nau rêh jêng. Ŭch lah tâm rơh tât wa mro geh ueh lăng n’hâm soan, nsôih tât ƀon lan gay bonh đă ƀon lan ƀa ƀơ gay kônh wa blau ndrel ƀư tĭng”.

            Rnơm nau kơl an bah ăp gưl uỷ, n’gâng kan n’gor ndrel ăp nŭih geh bu rnơm kơt bu ranh Ly Xạ Pu, rnoh rnăk ach o âk ding bah xã huch hôm bơi tât 64%, nkuăl kŏ geh 7 tâm rnoh 17 nkô̆ nau ndâk njêng ƀon lan mhe.

            Mô êng lah nŭih geh bu rnơm tâm ƀon lan, wa Ly Xạ Pu hôm lah ntung nthoi đah gưl uỷ, n’gâng kan ndrel ƀon lan, ndrel rmôt mât njrăng nau đăp mpăn n’har bri, mât nâp nkuăl neh dak. Wa Đào Văn Thức, Groi Kruanh HĐND xã Pa Ủ, n’gor Lai Châu mbơh: ‘Wa Ly Xạ Pu lah nŭih geh ntoh lư ngăn tâm nau bonh đă ƀon lan đăp mpăn nau rêh jêng; bonh đă ƀon lan rep kloh ngih vâl ƀon lan, hun hao văng sa. Rnăk wa nơm lah du rnăk vâl leo trong tâm ăp nau kan, hun hao mât rong ndrôk, sur. Rnôk aơ wa nê dôl lŏ bonh đă kônh wa ƀon lan ntrơn rgâl ntơm bah tăm ba mô jêng gay ma tăm ăp tơm tăm geh rnoh văng sa prêh lơn gay hun hao văng sa”.

           Bol ma lĕ 70 năm, bol ma n’hâm soan mô hôm kơt ntơm nơh, yơn bu ranh Ly Xạ Pu hôm nsôih hăn tât ăp ƀon, nkoch nau ân kônh wa djăt nau ueh bah nau ntrŭnh mhe; bonh đă ƀon lan nsôih pah kan jan sa, mât njrăng bri, mât njrăng ƀon, mât nkuăl n’har bri bah neh dak. Du bông nau rêh nsôih kan yor ƀon lan, đảng viên rnoi La Hủ nê mro nsôih  kơt tĭng ndrel ƀư tĭng nau ntĭm bah Wa Hồ đah ăp nau kan ueh nơih ngăn. Kơt lah chông ŭnh hit gring tâm nkuăl yôk prêh, wa hôm dôl ƀư duh răm nau rnơm tâm ƀon lan La Hủ tâm mpeh ba dâng bah neh dak./.