Ta nĕ an ndơ ăp tahen ơm, tahen sôt rmanh, Thủ tướng Lê Minh Hưng nkoch nău rngot hô n’hanh njuăl nău ôp khâl đêp rmên, nkah jru tât lĕ rngôch tahen ơm, tahen sôt rmanh, nuĭh geh soan đah cách mạng ta lam dak. Thủ tướng mĭn lah, lăp nting mham nău rêh “ngêt dak nkah gĭt tu dak” n’hanh nău ntĭm bah Kruanh Hồ Chí Minh, tâm lôch 79 năm bah năp, Đảng n’hanh Ngih dak uănh mro, ƀư tĭng uĕh trong kan rsơl plơng.

Ăp nău kơl an nar lơ jêh, nuĭh dơn pơk hvi. Ntrong leo “Lam ƀon lan mât uănh ăp nuĭh tahen sôt rmanh, tahen khĭt n’hanh geh soan đah cách mạng” lĕ rêng hvi têh dăng, dơi geh nău tâm ban ŭch rƀŏng kơl bah lĕ kon nuĭh. Ăp nău rŏng n’hanh lĕ đah nău kan nĕ boăt nthoi jêng nău uĕh kon nuĭh hô ngăn, nthoi tay nău way ơm bah rnoi nuĭh. Thủ tướng mĭn lah: Nuih n’hâm janh dăng n’hanh roh nău rêh bah ăp tahen sôt rmanh, tahen ơm lah nsơr soan bah chủ nghĩa janh dăng cách mạng, lah ntŭk nsing nuih n’hâm nâp nâl nău nsing nơm an lĕ trong chính trị tâm rơh rgâl mhe neh dak.