Bâh ăp nău pah kan mbơh nău tăch rgâl geh ƀư tâm rnôk mbơh nău ntuh kơl n’gor Đăk Lăk năm 2026 mhe nơh, geh rlău 150 ndrơng ndơ bâh 80 doanh nghiệp, hợp tác xã n’hanh ntŭk kan tâm n’gor n’hanh bah dih n’gor lĕ geh mbơh tơih âk ntil ndơ geh nău dơi kơt cà phê, ca cao, tiêu, dak sŭt, tơm ƀư dak si, ndơ sông sa nkret ƀư, ndơ ƀư ma ti ndrel đah âk ntil ndơ OCOP n’hanh ntil ndơ công nghiệp nkual ƀon lan ntoh lư. Aơ lah rơh nkhêp gay ma ăp nuĭh tơm  leo pah kan mbơh tơih nău ntơ, joi ntŭk kan ndrel, pơk hvi ntŭk tăch ndơ geh ƀư. Ndơn kan an du htx, wa  Nguyễn Duy Hùng an gĭt, geh n’gor njêng nău dơh nơih tât râng ăp nău kan mbơh tơih nău tăch rgâl lĕ kơl an ăp ntŭk kan OCOP geh gĭt dăch đah bu năch dŏng ndơ n’hanh ntŭk tăch rgâl têh lơn."Rơh tăch ndơ aơ geh ƀư dŭt ueh ngăn. Ăp ntŭk ndơ geh kơp dơn OCOP uănh năl dŭt âk bâh leo kan n’hanh mbơh tơih nău kan. N’hanh ngăn lah di du rơh ma n’gor Đăk Lăk mbơh nău nchrăp n’hanh ntuh kơl bâh n’gor ta rơh aơ rĭ an geh âk ngăn bu năch tât ta aơ gay ma mbơh nău tă blău kan n’hanh mpôl hên lĕ geh mbơh tơih dŭt âk ntil ndơ geh ƀư đŏng”.

Ta meng nău tâm rgop nău tăch rvăt ndơ tĭng trong kan way ơm, n’gor Đăk Lăk hôm nha kơl an doanh nghiệp, htx dŏng rgâl mhe rnoh mbrô tâm nău mbơh tơih n’hanh rvăt ndơ geh ƀư. ăp ntil rơh tăch ndơ trực tuyến, tâm rgop ta rnoh mbrô lĕ kơl an ntil ndơ geh ƀư ta ntŭk geh dăch lơn đah bu năch dŏng ngăch lơn, âk lơn, ntop n’hao săk rnglăy nău kan. Tât râng tăch ndơ ta rnoh mbrô, wa Lê Thị Hồng Thơm, ndơn kan an doanh nghiệp ƀư mỹ phẩm bâh tơm ƀư dak si xã Cư Prao, n’gor Đăk Lăk an gĭt."Rơh aơ  lah rơh tâm nđur tăch ndơ rgâl mhe rnoh mbrô bôk năp bâh n’gor Đăk Lăk lôch nglăp snsum n’gor. Ndrel đah nău leo ntil ndơ tât ta rơh tăch ndơ đah ăp trong kan way ơm gay ma tăch sŏng dăng tât rơh tăch ndơ rĭ mpeh công ty hên hôm nha tât râng ăp rơh tăch live rgâl mhe rnoh mbrô tĭng ntŭk kan mbơh nău tăch rgâl bâh ntŭk kan mbơh nău tăch rgâl ta n’gor kơl an. Nău ŭch lah geh mbơh tơih ntil ndơ bâh nơm tĭng âk trong kan êng êng n’hanh mbra dơi geh dăch đah bu năch bâh âk trong tăch rgâl êng êng”

Tĭng nău mbơh bâh wa Nguyễn Hải Triều, Groi Giám đốc Sở Công Thương n’gor Đắk Lắk, nău ŭch bâh n’gor mô dơn rlu ta nău n’hao nău ueh ntil ndơ ma hôm nha hăn ndrel đah doanh nghiệp, htx n’hanh ƀon lan kan lŏ mir tâm nău rdâk njêng nău ntơ, tâm rgop mbơh nău kan pă dŏng, mbơh tơih nău tăch rgâl n’hanh hun hao ta ntŭk tăch rgâl. Aơ lah ăp trong kan khlăy gay ma n’hao nău dơi khlăy ndơ tuch tăm, n’hao nău tâm rlong n’hanh an geh âk ntuh kơl ta trong kan nkret ƀư, tăch rvăt ndơ bâh ta ntŭk kan.“Nău an geh ngluh mbơh bâh n’gor đah ăp doanh nghiệp mô dơn lah nău pah kan jan sa ăp ntil ndơ geh nău mpŏng di ueh, ma hôm nha an geh leo ƀư ueh ăp nău tâm rgop mbơh nău ŭch dŏng, ntŭk tăch rvăt, mbơh nău ntuh kơl ueh di, ma hôm nha geh ƀư ueh ăp ntil nău pah kan tâm rgop tăch dŏng, nău kan tăch rgâl n’hanh rdâk njêng nău ntơ hun hao ta ntŭk tăch rgâl. Yor kơt nĕ bâh rơh tăch ndơ, n’gor Đăk Lăk lĕ geh ŭch mbơh an tâm di nău kan, nău mĭn ueh di ăp nău dơi geh tâm trong hun hao công nghiệp nkual ƀon lan mhe bâh n’gor. Nkre lah mbra nta nău dơh nơih ueh tâm rgop n’hanh mbơh tơih nău ntơ, joi trong kan ndrel n’hanh mpŏng tât tâm kơl ntuh kơl”.

Bâh nău kơl n’hao ueh ndơ ƀư tât tâm rgop ntŭk tăch rgâl, rgâl mhe rnoh mbrô n’hanh rdâk njêng nău ntơ, nău kan hăn ndrel bâh n’gâng kan ndrel đah ăp ntŭk kan têh dôl geh ntop tay săk soan gay ma an ƀon lan kan lŏ mir, htx n’hanh doanh nghiệp n’hao nău dơi geh ta ntŭk. Aơ lah nău kan khlăy gay ma n’gâng kan tuch tăm ta Đăk Lăk hun hao ting trong mhe, nâp nâl n’hanh n’hao soan dăng tâm rlong ta ntŭk tăch rgâl tâm dak tâm ban kơt dak bah dih.