Âk nău tâm rgop ta rơh rƀŭn nchră an lah, rgâl mhe ueh nđir n’hanh ƀư tĭng nău mpŏng kan ESG aƀaơ lah nău kan dŭt khlăy ngăn, an geh ƀư lôch gay ma doanh nghiệp mât rnoh ndơ kan, pơk hvi ntŭk tăch rgâl n’hanh n’hao nău dơi tâm rlong kan. Gay ma dơi ƀư nău kan, doanh nghiệp an geh n’huch rnoh ndok, mât uănh kloh ueh, dŏng an geh săk rnglăy ndơ ơm geh, rgâl ueh nău pah kan jan sa n’hanh mbơh kloh rjăp rnoh mbrô.

Tĭng ăp nuĭh way kan, doanh nghiệp an geh uănh nău rgâl mhe ueh nđir lah du rnoh ntuh kơl an hun hao nâp nal, mô dơi uănh aơ lah rnoh prăk ntoh hoach. Aƀaơ, doanh nghiệp mbra dơi ntơm bâh ăp trong kan geh rnoh prăk kan đê̆, nsĭt tay nău geh săk rnglăy âk kơt mpêt nkrem ŭnh nar, mât uănh rnoh ndok, rnoh mbrô pah kan n’hanh n’hao nău ueh mât uănh.

Wa Nguyễn Thành Long, nuĭh way kan mpeh mât uănh rnoh ESG an lah, ăp ntŭk an geh ăp nkual công nghiệp ueh mhe đah ndơ dŏng điện kloh, dak ueh dŏng tơh tâm pleh n’hanh mât njrăng ndok an tâm ban, njêng nău kan tơm gay ma doanh nghiệp ƀư tĭng ESG geh săk rnglăy n’hanh bah rnoh prăk kan rgâl mhe. “Đah ntil ndơ ƀư geh tăch an Châu Âu, geh 6 rmôt kan tơm dôl geh khuch tât lah loih, xi măng, nhôm, phân poh hidro. Aƀaơ lĕ geh prăk kan mpeh cacbon na nê̆ n’hanh an geh veh rnoh nsum ndơ ntil geh ƀư, mbơh gĭt na nê̆ ntil cacbon ta ăp ntil geh ƀư, ta ăp rnoh ndơ geh ƀư. Ăp doanh nghiệp an geh nchrăp ơm gay ma mô an geh nklơi tay ba kơi”.

Wa Phạm Anh Tuấn, kruanh UBND n’gor Gia Lai lah na nê̆: lvang 2026-2030, ta ntŭk geh uănh năl mbra ntrôl dăng rnoh mbrô, rgâl mhe nău kan ueh nđir, hun hao công nghiệp nkret njêng, ŭnh nar mhe njêng n’hanh tuch tăm công nghệ mhe. Aƀaơ, n’gor geh âk nău dơi gay ma hun hao  wăng sa nđir đah nău dơi têh ngăn mpeh ŭnh nar kloh ueh, nău dơi hun hao công nghiệp tâm pleh. Kruanh UBND n’gor Gia Lai tâm tom n’gâng mbra geh rgâl dăng bâh nău mĭn mât uănh jêng tât nău kơl kan, hăn ndrel đah doanh nghiệp mbơh tơih ăp nău nchrăp kan.  “N’gor Gia Lai mbra geh nău kan hăn ndrel đah doanh nghiệp tâm nău rgâl mhe ueh rnoh mbrô. Ngih dak mbra kơl ăp nău kan na nê̆ bâh du đê̆ nău kơl kan. Yơn khlăy ngăn lah naư mĭn bâh nuĭh leo bôk năp n’gâng kan, doanh nghiệp an geh saơ aơ lah nău kan khlăy an dơi geh gay ma rgâl mhe dơi ueh tâm nău rêh. N’gor mbra geh ntĭm đă tay, ƀư tay răng dăng mbơh tơih ăp nău rgâl mhe ueh nđir ta n’gor đah nău mĭn kan ngăch lơn, răng dăng lơn n’hanh săk rnglăy lơn.