Bah 4 mông 30 ôi, ƀon treh jal Mũi Né (phường Mũi Né, n’gor Lâm Đồng) răm m’ak rnôk ăp mpôl tàu sĭt jêh du măng tĭng dak lêng. Hang rhiăng tàu ka n’hanh duk rgum bah dih dak lêng, tâm rnôk ta kơh dak lêng, nău ƀư rwăt tui ka lĕ ntơm n’gŭr răm. Uănh bah prêh, hang rhiăng tàu ka n’hanh duk njưh ta nkual dak lêng, jêng ntŭk ntô ntĭt mpơl êng bah ƀon treh Mũi Né ăp ôi ơm.

Ta aơ, duk thúng lah duk mô dơi mô geh ndơ̆ nuĭh n’hanh tui ka bah tàu ka lăp kơh. Mông nar chợ ơm n’gŭr răm rnôk nuĭh ƀon lan n’hanh nuĭh ƀĭt duk rgum ta kơh dak lêng rwăt tui ka nkre dơi lăp ta kơh. Ăp dông ka rih dơi nuĭh ƀon lan ngăch tâm pă dâl ta kơh dak lêng lor rnôk rdêng tât ăp chợ n’hanh ntŭk rwăt tăch.

Jêh nar rgum nchợ, ăp nuĭh joi ka ndăn rơih n’hanh sĭm tay jal, nchrăp an rơh hăn dak lêng bah kơi. Dak lêng rhoăt, âk nuĭh ƀon lan ndăn dônh sò n’hanh săch tui ka mper kơh, rgop ntop tay nău geh. Jêh âk mông pah kan ŏk r’ah, ƀon treh mbrơi plơ̆ tay nău rêh đăp mpăn. Rmôt tàu ka njưh ta dak lêng pŭt đah duh nar chăng

Mô knŭng lah ntŭk joi nău rêh bah âk rơh nuĭh ƀon lan joi ka, ƀo chài Mũi Né hôm mât ăp nău uĕh ntĭt mpơl bah nsum mpôl ƀon lan mper dak lêng. Ăp rơh tàu plơ̆ sĭt rnôk ôi ơm, nău rwăt tăch tui ka âk mpưm, rup ndah wah duk, sĭm jal hang rhiăng tàu ka njưh bah dâng duh ôi ơm lĕ jêng rup ndah pah kan yơn âk nău rêh ueh.

Nău rêh uĕh lăng nĕ lĕ rgop ƀư an ueh êng bah Mũi Né, ntŭk pâl nđaih mô knŭng joi saơ nău ueh bah dak lêng ma hôm dơi saơ n’hâm nsôr ngăn ngên bah du ƀon treh jal way ơm dơi mât ndrăy rlău âk rơh./.